NECS CUP Vawiinah Aizawla inkhel thiam veng inlan dawn

Vawiin hian NECS CUP 2015 inter village football tournament quar­ter final chu Lammual-ah khelh a ni dawn ta a, tlai dar 3:00-ah Champion lai Ramhlun South leh Dinthar an inkhel ang a, zan dar 8:00-ah Khatla leh Armed Veng South an inkhel bawk ang.

Vawiin tlai hian Lam­mualah inkhel en turin mipui an kal khawm hem a nih pawhin thil mak a ni hran lo ang. Aizawl a football atchilh veng pahnih Dinthar leh Ramhlun South te hian engtiklai mahin fans an nei tlem ngai lo.

Inkhel hmasa turte

Dinthar lamah hi player naupangte te ho khawm turin senior player an luhtir ṭhin a, an inkhel hnuhnung ber a hat-trick siamtu striker Lalnunmawia leh midfielder tawnhriat ngah Samuel Laltlanthanga te hi an pawimawh leh hle ang.

Tlar hmaah Zico Zo­remsanga an nei a, in­nghahna tham a ni ang. Chak turin goal chhuah loh a pawimawh a tlarhnuah Muante leh Hmingmawia te an neih bawk avangin Ramhlun South hian Champion nawn an tum hle ang.

Eng nge an sawi?

Dinthar coach Lalnuntluanga chuan, "Kan khingpui turte hi team ṭha tak an ni a, inkhel tur kan nih avangin huphurhin awmzia a nei lo. Chuvangin chak ngei turin kan theih tawpin kan bei ang," a ti.

Champion lai Ramhlun South coach HC Zarzoliana chuan,"Dinthar hi team ṭha tak ni mah se kan huphurh hran lo a, football-ah chuan result sawi lawk tak tak theih ni lo mah se kan chak ngei ka beisei," tiin a sawi.

Zan lamah

NECS CUP 2015 khelh ṭan dawn khan Khatla leh Armed veng South te hi mipui ngaihven an ni lo ti ila a sual tam lo maithei. Mahse, tournament an khel chho a team ṭha leh hlauhawm an ni tih an lamtir ve ve tawh. Zana inkhel tur annih avangin chhuna hnathawk tan pawh a en theih dawn a, mipui an tamin au thawm a ring hle tur a ngaih a ni.

Last 16-ah khan Khatla hian Aizawl veng hlun tak Chhinga Veng chu 2-1 in an hneh theih avangin inrintawkna an nei lianin an khingpui tur hi an huphurh hran lo ang. Armed Veng South lam ve thung hian Aizawl khaw pawn, Farkawn 2-1 in an hneh avangin an zam bik lo anga, mahse chak an tum chuan hmasawn an ngai ang.

Armed Veng South hian tun tour­nament-ah hian goal ruk chauh an la khung a, an goal thun zawng zawng hi winger Lalrammuanpuia thun vek a la ni. Muanpuia hi a khelh ṭhat ni chuan chak pui tham khawpa thiam a ni. Midfield-ah Chanmari West player Ramdina an neih bawk avangin team chhia an ni lo.

Tun hmain Aizawl veng dangte nena khaikhin chuan Khatla hian football an tui pui lem lo. Mahse tunah chuan thil a danglam tawh a, an buaipui em em tawh thung. Khatla team-ah hian ram pum huapa player langsar awm lem lo mah se an team thawhhona ṭha hi an hmachhuan ber a ni. Semifinal thleng tur chuan striker Anggu Lalrammuana a chet ṭhat a pawimawh ang. Ani hi last 16-a chakna goal khungtu kha a ni.

Eng nge an sawi?

Armed veng South coach Lalram­hluna chuan, "Quarter final thleng phak chinah chuan team chhia an awm thei tawh lo. Khatla pawh hi an chhe lo tih a hriat vek tawh, mahse kan huphurh hran lo a semifinal kan luh ngei ka ring," tiin a sawi.

Khatla coach C. Lalngaihawma chuan, "Kan khingpui turte hi kan huphurh hran lo, player langsar tia sawi tur nei hran lo mah ila kan team pumpui tawhho na leh veng mipuite ṭawiawmna azarah ikan chak theih ka beisei," tiin a sawi.

Inkhel en tur te hriat tur

Inkhel en tur mipuite innekbuai loh nan leh a felfai zawk theihna hetiang hian ruahman na siam a ni.

Inkhel hmasa zawkah Ramhlun South ṭantute K. Kawla Stand-ah ṭhut tur a ni ang a, Dinthar ṭantuta Zomuanthanga Stand-ah ṭhut tur a ni ang. inkhel hnuhnung zawkah Khatla ṭantute K. Kawla Stand-ah ṭhut tur a ni anga, Armed Veng South ṭantute Zomuanthanga Stand-ah ṭhut tur a ni ang.