FA ruahmanna an hnawl

England football thuneitu sang Football Associations-in 2016 Rio Olympics-a Great Britain football team chungchanga ruahmanna an siam chu ram dangin an hnawl.

FA chuan Olympic-ah mipa leh hmeichhe team tirh an duh a, an ruahmanna siam chu Scottish, Welsh leh Nor­thern Irish associa­tions hnenah an hriattir vek a, mah se ram dangin an ṭawmpui lo.

FIFA vice president Jim Boyce chuan Great Britain team hi an hnuaia ram zawng zawngin an pawm tlan chuan Olympic-a telh an phal tur thu a sawi tawh a. Amaherawhchu a hlawhtling dawn lo niin a lang.

Scotland FA chuan London 2012 Olympic-a kha chu thil danglam bik a ni a, a bakah chuan FIFA hnuaia ram hrang ṭheuha an khelh theihna a nghawng theih dawna an hriat avangin an duh tawh lo. English FA hian ram dang thuneihna an dah hniam nia an ngaih thu a sawi.

Football Association of Wales president Trefor Lloyd Hughes pawhin Great Britain team din thar leh chu an duh loh tawp thu a sawi bawk.

London 2012 khan Great Britain team chu Olympic-ah an tel a, amaherawhchu quar­terfinal-ah South Korea penalty shootout-a an hneh loh avangin medal an dawng pha lo.