Hnam hla play sual vangin El Salvador an thinrim

Inrinni khan El Salvador leh Argentina te chuan friendly match USA-ah an khel a, inkhel ṭan hma in organiser te chuan EL Salvador hnam hla an play sual palh a, sawisel an tawk nasa hle.

Friendly match organise tu CMS Sports chuan an thiamloh thu a nih sawiin mipui te chu ngaihdam an dil a, tihpalh liau liau a nih thu an sawi. Organiser te hian El Salvador hnam hla play an tum laiin Isle of Man hnam hla 'O Land of Our Birth' tih chu an play palh a ni.

FedExField stadium- Maryland-a inkhelah hian Argentina chu 2-0 in an chak. Inkhel hi mipui 50,000 chuangin an en a ni.