Player te an induh tur a ni lo - Lineker

England striker hlui Gary Lineker chuan European Championship U-21 ah an player pawimawh te'n khelh an duh lo a nih chuan ram tan thil zahthlak tawp khawk a nih tur thu a sawi.

English club tam zawkin an rawlthar player te an chhuah phal loh maitheih thu thuthang awm vanga he thu hi sawi a ni.

Barcelona player hlui Line­ker chuan, "Club ho in an player ṭha te chhuah an phal lo a nih ngat chuan ram tan thil zahthlak tawpkhawk a ni dawn a ni. Friendly match-ah England U-21 in Germany U-21 an hneh thei a, senior player tlemin han pawlh leh hret se, Euro-ah kan champion thei ang," a ti.

U-21 player pawimawh ni ṭhin Tottenham Hotspurs striker Harry Kane chu tunhnaiah senior team-ah koh a ni a, a match hmasa berah Lithuania lakah goal a khung nghe nghe. U-21 in Euro an khelh theihna tura player pawimawh a ni.

England Under-21 coach Gareth Southgate chuan, "Eng­land manager Roy Hodgson nen kan in be tawh a, a ni chuan Kane hi Czech Republic-a Euro U-21 kan khelh hunah kal se a duh.Euro khelh chhunga senior team match hnih khelh tur awm ai hian a hlawkpui zawk a beisei a ni," a ti.

Southgate chuan sawi belhin, "Player-te hian U-21 Euro championship khel phawt se, seniro team a an khelh hunah pawh hei hi an chhawr zawk dawn a ni. Harry Kane pawh hian U-21 Euro Championship khelh hi a mamawh hmasa a ni," a ti.

Middlesbrough manager hlui Southgate chuan Liverpool player Sterling chungchang sawi kaiin, "Liverpool leh England senior team-ah player pawimawh ber pawl a ni tawh a, U-21 tan chuan a khelh a rinawm tawh lo a ni,"a ti.

Everton manager Roberto Martinez chuan a rawlthar duhawm kum 21-a upa Ross Barkley chuan Euro khelh hunah chawlh hahdam a mamawh tur thu sawiin, Tottenham lam pawhin Kane hi a chauh lutuk an lo hlau ve mek bawk a ni.

England U-21 hian Kane leh Sterling te tel lo in Pathianni zan khan Germany U-21 chu friendly match-ah 3-2 in an hneh a ni.