Rossi a la dam lo

Valentino Rossi chu tun hnai khan Covid-19 aṭangin a filhim tawh em tih endik leh a ni a, hri hi a la vei avangin tun kar tawpa Grand Prix of Teruel an tlan hunah pawh a la inlan thei dawn lo niin a team Yamaha chuan an sawi.

Yamaha rider hian hri leng a kai a, kar hmasa khan Aragon Grand Prixa-ah pawh a inlan thei lo. Natna nei em em hran lo mah se khung hran lai a ni a, midang nena inpawh a la rem loh avangin atan training pawh neih theih a ni rih lo.

Kum 41 mi Rossi hi a rei lo berah ni 10 tal khung hran phawt a ni dawn, chumi hnuah a dam chiang em tih endik leh a ni ang. Kar hmasa ang bawkin tur kara inelna an neih hunah Rossi aiawhtu an awm dawn lo, Maverick Vinales chauhin team ai a awh leh ang.

Bike intlansiakna khawvelah Rossi chauh hi coronavirus vanga buai a ni lo. Moto3 lamah Italian rawlthar Tony Arbolino chu hri kai nen an inhnimhnaih avangin khung hran mek a ni a, Spanish rider Jorge Martin pawh hri a kai avangin September thla khan Moto2-ah vawi hnih a inlan lo.