Vawiinah I League Second Divison Aizawl FC leh Chanmari FC te inlan dawn
Thawh khatnaah Mizoram Premier League club Aizawl FC leh Chanmari FC te 4-1 in an chak ve ve a, vawiinah thawh hnihna Kanchenchunga Stadium, Siliguri-ah an khel leh ang.
Zing dar 9:30-ah Aizawl FC-in season liam taa 4-0 a an sawp tawh Kenkre Sports an hmachhawn dawn a, Chanmari FC chu tlai dar 3:15-ah Delhi club Hindustan FC nen an inkhel thung ang.
Inringtawk Aizawl FC
MPL3 champion Aizawl FC-in nikuma an hneh tawh Kenkre Sports hi hneh loh theih an ni tih an chiang, mah se an zam lo. Aizawl FC technical director Hmingthansanga chuan, "Nikuma kan inkhelh kha chuan foreigner an nei lo a, tunah chuan an nei tawh. Team chhia an ni lo a, an foreigner pahnih an rawn thlen phei chuan an ṭha sawt ang. Chutihrualin kan chak chu kan ring khawp mai, Mizo mipui ṭawngpuina kan ngen a ni," a ti.
Kenkre Sports hi an match hmasa berah Chanmari FC lakah 1-4 in an tlawm a; nimahsela Aizawl FC an khelh hunah Chanmari FC an khelh ṭuma tel hman lo foreigner pahnih an thlen belh a rinawm a, chu chu Kenkre beiseina siamtu tur a ni.
Aizawl FC coach Malsawmkima chuan, "Chanmari FC nena an inkhel kha kan thlir a, Kenkre chu an nêm deuh chuan ka hria. Chutihlaiin foreigner pahnih an neih belh chuan kan hmuh tawh nen khan an inang kher lo ang," tiin an khingpui tur a hmuh dan a sawi.
National Games-a Mizoram champion puitu coach Mala chuan, "Match khelh tur a tam a, player ngai chuan kan khel lo ang. Foreigner erawh a ngai pahnih bawk kan hmang ang," tiin defender Emmanuel Chigozie leh forward Alfred Kemah Jaryan a rin chhunzawm tur thu a sawi.
Aizawl FC squad a chhah ṭha a, an khelh hmasak ṭumin midfield-ah MPL lama an chhawr rim H. Lalbiakthanga leh Albert Zohmingmawia bakah MPL2 best player R. Malsawmkima te'n starting eleven an chang lo a, tu emaw ber hi chuan bul an ṭan tawh ngei ang.
Chanmari fiah tlai
Thawhṭan tlaiah Hindustan FC leh PIFA Sports te an inkhel a, mak tak maiin team ṭha lo zawka ngaih PIFA-in goal hnih an khung hmasa. Delhi club Hindustan FC-in an si phurh an sut vek a, hnehna erawh an chang thei ta bik lo.
Hindustan hian Nigerian striker Sola an kawl a, ani hian Delhi Senior Division-ah goal 17 a khung a, nikum I League second division khan goal li a khung. Player pakua hi Santosh Trophy-a Delhi state team-a khel an ni a, Mohammedan SC aṭanga an lak James Effiong chu an innghahna tur a ni.
Chanmari FC coach H. Vanlalthlanga chuan, "I League second division-ah hi chuan team zawng zawng an ṭha vek. Aizawl FC khan Lonestar Kashmir kha an sawp a, amaherawhchu inkhelh ṭan tirh lam kha chuan Kashmir kha chak zawk tura ngaih an ni hman. Chuvangin team tin hi hneh loh theih vek an ni a, Hindustan pawh hi an ṭha a ni," tiin a sawi.
Thlanga chuan, "Starting eleven-ah chuan a ngaia kan luh ka ring a, chutihrualin kan practice-a che ṭha fal an awm chuan a thlak danglam theih bawk. Tun dinhmunah chuan inkhel tur tihchian ngam a la ni lo," a ti.
Chanmari FC-in an game hmasa berah Kenkre an sawp a, Joel Sunday, F. Lalrinpuia leh Malsawmfela te'n goal an khung.
MPL2 champion team hian starting eleven-ah tlar hma lama tlan ṭhin player an dah lut tam a, match khatnaah an tifuh a, match hnihnaah Hindustan club lakah fiahin an awm dawn.
Vawiin Inkhel Tur
9:30 AM Kenkre Sports Vs Aizawl FC
3:15 PM Hindustan FC Vs Chanmari FC
Naktuk Inkhel Tur
9:30 AM Mohammedan SC Vs Lonestar Kashmir
3:15 PM PIFA Sports Vs United Sports Club
Team Dinhmun
# Team Pld W D L GF GA GD Pts
1 Aizawl FC 1 1 0 0 4 1 3 3
2 Chanmari FC 1 1 0 0 4 1 3 3
3 Mohammedan 1 1 0 0 2 0 2 3
4 Hindustan 1 0 1 0 2 2 0 1
5 PIFA 1 0 1 0 2 2 0 1
6 United 1 0 0 1 0 2 –2 0
7 Kenkre 1 0 0 1 1 4 –3 0
8 Lonestar Kashmir 1 0 0 1 1 4 –3 0