Goal record nih rualtu Falcao

Manchester United striker Radamel Falcao chuan Thawhṭanni zana Colombia-in friendly match-a Kuwait 3-1 a an hneh ṭumin goal a khung a, Colombia tana goal khung tam ber Arnoldo Iguaran a nih rual chiah.

Kum 29-a upa Falcao hian United tan vawi 22 inlanah goal li chauh khung mah se, ram tan a khelin harhtharna a chang a, Bahrain 6-0 a an sawp ṭumin goal hnih a khung a, Kuwait lakah penalty aṭangin a khung zui.

Mohammed Bin Zayed Stadium, Abu Dhabi-a inkhelah minute 22-naah Abel Aguilar-a'n nalh zetin a volley goal a, Kuwait-in first half tawp hma hretin Al Buraiki-a corner pet chu Musaed Al Enazi-a'n a tlawh goal.

Second half-ah Ku­wait-in hmahruai theih­na hun ṭha an nei nachungin Al Buraiki-a'n keeper chauh a hma­chhawn hnuah a ti-goal thei lo a, hemi hnu hian goal ban a pet per leh bawk.

Colombia an insiam rem a, minute 68-naah yard 25 aṭangin Edwin Cardona-a'n chiang zetin a khung. Minute 74-naah Falcao-a'n a penalty hlawhchhuah chu goal-ah a chantir leh bawk. Amaherawhchu replay en let chuan Falcao tlukna hi penalty area pawn chiah niin a lang.

Colombia 3-1 in an chak a, kum 2001 hnua a vawi khatna atan a zawnin vawi ruk an chak. Goal thumna khungtu Falcao hian ram tan vawi 56 a inlan tawhah goal 24 a khung a, record siam turin goal khat chiah a mamawh ta.

Falcao hian United-ah kar khatah £265,000 (Rs 24,501,266) a hlawh a, contract nghet ziak tur chuan United-in pound maktaduai 43.5 an sen a ngai a, a khelh dan enin la nghet duh tak maw?