Clippers leh Rivers an inṭhen

NBA club ṭha Los Angeles Clippers leh an coach Doc Rivers te an inṭhen fel, Western Conference semifinal an paltlang zawh loh hnuah Rivers hian kum sarih chuang a lo chamchilh tawh club hi a chhuahsan a ni.

Clippers hian playoff an hmang chhe lem lo, an khingpui Denver Nuggets pawh an hneh ngei dawn niin a lang hma. Amaherawhchu 3-1 a hma an hruai hnuah an chesual a, a zawna vawi thum an tlawm avangin 4-3 in an chak lo.

Thlahna thu sawiin Los Angeles Clippers chuan, "Inremsiamnain Doc Rivers chuan a hna a kalsan, kan hnena a awm chhung khan kawng hrang hrangin hna ṭha tak tak a thawk a, team a enkawl bakah hna pawimawh dang pawh a thawk tel.

"A thil tih leh sulhnu te avangin club chuan a chungah lawmthu kan sawi, a hma hunah pawh hlawhtlinna a chan belh zel kan ringin duhsakna sang ber kan hlan bawk a ni," tiin a sawi. Kum 58 mi River pawhin Clippers chunga a lawm thu a sawi ve a, club neitu Steve Ballmer chuan an coach pawimawh tak mai a chhuak chu a ui thu a sawi a, chutihrualin coach leh club tana thil ṭha zawk a nih a beisei thu a sawi tel bawk.