Barcelona-in hmahruaitu an hneh

Team talbuai Barcelona-in La Liga nomawi an la beisei ve reng tih pholangin hmahruaitu Real Sociedad chu 2-1 in an hneh a, pariatna dinhmun aṭangin panganaah an invawrh chho. 

Nou Camp-a inkhelah Sociedad-in Willian Jose hmangin goal hmahruai an khung a, mahse Barca-in Frenkie de Jong leh Jordi Alba goal khung hmanga chhangletin 2-1 in an chak. 

Barca-in hnehna an chan avangin Atletico Madrid chu hmahruaitu an ni ta bawk a, Sociedad leh Real Madrid nen point 26 ṭheuh an nei - mahse, Atletico hian Sociedad aiin match hnihin an khel tlem a, Real aiin match khatin an khel tlem bawk. 

La Real-in (Sociedad sawina) inkhel ṭan aṭanga minute 27-na lekah goal hmahruai an khung a, Willian Jose chuan mahni hmasial lo taka attacking midfielder Portu-a siamsak chu goal-ah a chantir. 

Mahse, Barca an indawmkun rei lo. Jordi Alba chuan minute 31-naah a ke ding lam hmangin goal chung kil sirah a thlawh lut a, De Jong chuan minute 43-naah Alba ball cross aṭanga ball kal chu si phurh sut nan a hmang bawk. 

Dutch midfielder De Jong-a goal khung hi pawm a ni lo zet a, mahse video assistant referee (VAR) hmanga ennawn a nih hnuah pawmsak a ni. 

Barca-in an phu ang ngeiin hnehna an chang a, Antoine Griezmann chuan bar a tih per bakah goal ruakah a tlawh lut thei lo bawk. French forward vanneih zan ni se, Barca hi goal tam zawk khung thei an ni. 

Catalan club enkawltu Ronald Koeman chuan, "Tuna kan rilru puthmang leh duhna anga kan khelh zel chuan kan awmna tur dik takah kan la awm thuai ang. Tun season-a first half kan khelh ṭhat ber a ni hialin ka ring - ball kan keng thei a, kan nawr na em em bawk. 

"Second half-ah Real-in an khel ṭha zawk a, chak duh pahnih kan innawr nasa hle a ni. Minute 90 chhung inkhel thunun theih a ni lo a, kan rilru puthmang en khan chak kan phu zawk a ni," tiin a sawi.