Sawiselna karah Kohli-a'n Bangalore chakpui

Indian Premier League-ah Thawh-ṭanni zan khan inkhel hmuhnawm bik a awm a, Royal Challengers Bangalore-in super over-ah Mumbai Indians an hneh. 

Virat Kohli telna Bangalore hian run 201/3 siamin awlsam taka chak turah an inngai a, over 20-ah Mumbai-in run 201/5 chiah an rawn siam ve bawk. India captain Kohli hian game pangngaiah run thum chauh siam mah se super over-ah lutin chakna run a siam.

Zanin hian IPL khelh chhunzawm a ni dawn a, zan dar 7:30-ah Rajasthan Royals leh Kolkata Knight Riders te an inkhel ang.

IPL chauh ni loin cricket inelna a nih tawh chuan Virat Kohli chanchinin ngaihven a hlawh. India captain hi Royal Challengers Bangalore captain a ni a, match hmasa bera Sunrisers Hyderabad an hneh ṭumin run 14 chiah a siam. 

Bangalore hi match hnihnaah Kings XI Punjab lakah mualphoin Kohli run siam chu run khat chauh a ni. Match thumnaah pawh Kohli hi a la insiamṭha chuang lo a, Mumbai Indians nen pawh run thum chauh a siam.

Virat Kohli-a'n match thum aṭangin run 18 chauh a siam a, social media lamah an sawisel nasa hle. Amaherawhchu India captain meuh ni pha Kohli hi match thum khelh chhiat vangin a talbuai phah lo a, pressure sangah mawhphurhna a la ngam.

Kohli 'hero' hma hian inkhelh hmuhnawm a awm. Ṭhumvawrah Mumbai Indians an vannei a, vawm hmasak  an thlang. Bangalore tan opener Devdutt Padikkal (54) leh Arron Finch (52) ten half century an siam ve ve.

AB De Villiers-a'n thi loin ball 24-ah run 55 a vaw chhuak a, Shivam Dube-a'n ball 10-ah run 27 a siam. Over 20-ah Bangalore-in run 201 an siam a, chak turin an dinhmun a ṭha hle.

Mumbai Indians bat hun a thleng a, top order pathum captain Rohit Sharma (8), Quiton de Kock (14) leh Suryakumar Yadav (0) te an talbuai. Amaherawhchu Ishan Kishan leh Kieron Pollard ten beisei awm tawh lo aṭangin beiseina an rawn siam.

Patna, Bihar-a piang Ishan Kishan hi kum 22 mi a ni a, India aiawhin la khel lo mah se Ranji Trophy-ah chuan Jharkhand tan hming a chher tawh hle. Bangalore nen pawh hian Kishan hian a ball hmachhawn apiang chu kil tinah a sem darh a ni ber a, four vawi hnih vuain six vawi kua lai a vaw chhuak. 

Ball hnih a la awmin Mumbai Indians tan chak turin run nga siam a la ngai a, Kishan hian six run vuak tum mah se Devdutt Padikkal-a'n boundary line bulah a man chat. Run 99 siamin Kishan a thi a, Mumbai Indians tan chak turin six runs vuak a ngai a, inhnehtawk turin four runs a ngai.

Windies star Kieron Pollard-a'n four a vua a, Mumbai-in run 201/5 siamin an inhnehtawk. Pollard hian ball 24 lekah run 60 a siam a, Mumbai beiseina siamtu a ni.

Super Over-ah Bangalore-in Navdeep Saini an vawmtir a, run sarih chauh pein Pollard a vawm hlum bawk. Mumbai tan Pollard-a'n run nga a siam a, Rohit Sharma-a'n a bat hman lo a, run 99 siamtu Ishan Kishan erawh awltir a ni thung.

Mumbai Indians-in bowler ṭha mi Jasprit Bumrah an kawl a, Super Over-ah an chak ziah. Chutihrualin Bangalore captain Kohli-a'n thutlukna a siam a, AB de Villiers nen an lut. Bumrah hian a ball vawi ruk vawm hi ṭha tak vekin a vawm a, ball vawi hnih vawmnaah phei chuan De Villiers a vawm hlumah a ngai. Amaherawhchu en let a nih hnuah Villiers-a bat ni loin a helmet zawk a nih avangin a thi lo.

Bangalore an vannei a, De Villiers-a'n four a vuak fuh bakah ball hnuhnung ber hmachhawntu Kohli-a'n four a vaw leh bawk. Bangalore captain Kohli-a'n hun pawimawhah player danglam bik a nihzia a pholang a, hun harsaah Royal Challengers a chakpui.