US Open Final : Pegula hmachhawn tur Aryna Sabalenka
Tennis inelna lian US Open chu a hmawr bawk a ni dawn ta - zanin zanlai dar 1:30 hian hmeichhe singles final khelh a ni dawn a, tualchhung nula Jessica Pegula leh Aryna Sabalenka te an inhmachhawn ang.
Nimin zing khan semifinal khelh zawh niin, match hmasa zawkah Sabalenka chuan Emma Navarro chu 6-3, 7-6 (7-2) in a hneh a, inkhel pakhat zawkah Pegula chuan set a hloh hnuin Karolina Muchova chu 1-6, 6-4, 6-2 in a hneh ve bawk.
US Open hmeichhe huangah hian 2022 khan Iga Swiatek a champion a, season hmasa khan Coco Gauff a champion thung, kuminah champion hmel thar kan hmu leh dawn, kum thum chhung mihran zel an inlar dawn tihna a ni.
Mipa semifinal chu tukin hian khelh zawh a ni dawn a, champion thar an awm ngei dawn - Pathianni zanlaiah a hmawr bawkna neih chhunzawm ve thung tur a ni bawk ang.
Mikhual nula
Aryna Sabalenka hi Belarusian nula a ni a, an inkhelhna hmun hi United States a ni thung. US leh Russia an inhal em em a, a bik takin Ukraine ram buaina chungchangah an thu a inhmu lo - Belarus hi Russia thlawptu an ni thung.
Ram chhung politics buaina hi infiamna huangah chuan seng luh phal a ni lo, mahse mipui thinlungah erawh chi angin a intuh nghet tlat si, tun ṭum final an khelh turah pawh hian season dang zawng aiin Pegula hian ṭantu a ngah zual dawn.
Pegula hi New York khawpui a piang a ni a, anmahni khawpuiah ngei ṭantu a ngah hi a mak lo - final boruak sang leh thawm na vang erawh chuan Sabalenka hian buai a tum lem lo, tawnhriat a nei ṭha tawkah a ngai.
Semifinal-a a hneh tak Navarro pawh American mi tho a ni a, mual sir lam aṭanga thawm na hmasa chu a paltlang tawh tihna a ni. Sabalenka chuan, "Mipui te kha ka khingpui tan an au char char a, a tawpah erawh ka tan an au ve thung.
"Match tin mai hian hmasawnna ka nei zel, tournament tir lam ai chuan a tawp lam ka hman dan chu lawmawm tak a ni tawh. Final kan khelh turah pawh hian ṭha lehzual zawka inlan theih ngei ka ringin ka beisei bawk," tiin a sawi.
Serena Williams (2019) hnuah Sabalenka hi US Open a zawna final lut leh thei hmasa a ni a, nikum final boruak kha a la theihnghilh lo ang. Mipui ṭan rawn Gauff a hmachhawn tawhna aṭangin thil tam tak a zir tawhin a rinawm a, inrintawkna a nei sang bawk.
US nula Pegula
Tennis ngainatna ram US khawpui lian New York-a piang a ni a, a naupan lai aṭanga infiamna a en nasat leh ngainat chu tennis a ni. Engtik niah emaw chuan Grand Slam, a bik takin US Open champion ka la ni ve ang tiin duhthu a sam ṭhin.
Duhthusam neitu, hun rei tak nghak tawhtu Pegula chuan a suangtuahna tihpuitlin theihna remchang a nei dawn. Grand Slam quarterfinal vawi sarih a khelhnaah a vawi khat nan semifinal a lut a, tunah chuan final thlengin a invaw kai ta.
Kum 30 mi Pegula chuan, "Engtiangin nge ka tan hun ṭha a rawn inherchhuah tih hi sawi mai dan pawh ka thiam lo zawk. Dinhmun ṭha loa din tawh hnua thawhchhhuah leh chu a hlut dan pawh a danglam takzet tih a takin ka hria.
"Duhthusam ka lo neih ve ṭhinte kha a tak thleng turin hmabak hautak tak hlenchhuah tur erawh ka la nei. Player ṭha leh tawnhriat nei, season hmang ṭha tak mai ka hmachhawn dawn avangin kawng tinrenga ka fimkhur a ngai ang," a ti.
Pegula hian tun season French Open a khel thei lo a, inelna lian dang pahnih Australian Open leh Wimbledon an khelh ṭum khan second round paltlang zo loin a tla nghal, tun ṭumah erawh vawi khat a chak leh a nih chuan nomawi a chawi dawn.