I League 3: Zaninah Chanmari an inlan dawn

Indian football fourth division inelna, season hmasa aṭanga khelh ṭan I League 3 chu RG Stadium, Aizawlah khelh chhunzawm zel a ni a, zanin dar 7:00 hian Mizo club Chanmari FC an inlan leh tawh dawn.

Chanmari hian an match hmasa berah team ṭha Coramandal FC chu 3-1 in an hneh thei a, zanin hian match hnih an khelh tawha chak la nei lo RKM Football Academy an hmachhawn dawn avangin chak an inbeisei ang.

MPL club president Vanlalruatfamkima'n I League 3 khelh ṭan hmain, "Mizoten I League club kan neih belh ngei theih nan Mizo mipuite thlawpna kan mamawh takzet a, a hmun ngeia min ṭawiawm turin ka sawm che u a ni," tiin inkhel en turin mipui a sawm.

Mahse, Chanmari match hmasa berah Mizo mipuiin Mizo club an ṭawiawm ṭha tawk lo a, MPL club hi khualmuala inkhel ang mai an ni - sum ṭhahnem tak senga I League 3 khel Chanmariin Mizo football fan-te puihna an mamawh a, zaninah RG Stadium-a an inkhel en turin min sawm e.

Chanmari an ṭha

I League 3-ah hian team 25 awmin, group pangaah team panga zel awmin ṭhen hran an ni a, group tin aṭang hian a sang pahnih ṭheuh chu playoff khel turin an tling leh ang - playoff-ah hian an inkhelh kual hnuin a sang pathumte chu season thara I League 2 khel turin an tling dawn.

Group pangate hi hmun hran ṭheuhah khelh niin, Chanmariin Group C inelna an thleng a, mahni muala inkhel an nih tel avangin harsa loa playoff khel thei tura beisei an ni - match hmasa berah goal thum an khung nghal pang.

Chutihrual chuan Coramandal laka an goal hmasa pahnih hi vanneih vang tiin a sawi theih a, penalty leh Coramandal defender tihsual zar a ni. Goal thumna khungtu John Lalrempuia Sailo goal khung erawh sawi hnawm theih a ni lo a, a 'class' thlawt.

Chanmariin MPL an khelh tel avangin an chau a, chutihrual chuan Coramandal laka hnehna an chan aṭanga darkar 15 vel hnuah Aizawl FC hmachhawnin, I League club hi 1-1 in an inhnehtawkpui thei - coach Lalsangzuala'n I League 3 match-a bul ṭan player 10 ngawt a thlak danglam a, hei hian an squad chhahzia a hrilhfiah.

A harsa

Chanmari an ṭhat ruala hriat tel tur chu an elpuite an ṭha ve tho - rin kai zinga mi HAL SC chuan match hmasa bera RKM an hneh hnuin, an match hnihnaah Mighty Young Joe-Goalorious Mothers Sports Club chu 1-1 in an inhnehtawkpui leh bawk.

Hetihlai hian beiseina thar nei turin Coramandal hian Ningani zan khan RKM chu 3-0 ngawtin an sawp a, striker chhuanvawr George Kom chuan goal hnih khungin Ithoi Singh chuan goal khat a thawh ve bawk.

Coramandal-in hnehna an chan avangin beiseina an nei thar a, Chanmari tan HAL leh Coramandal tlanpel turin zaninah chak a pawimawh - HAL laka injury time-a si phurh suttu GMSC pawh hi Chanmari hmaa la ding tur an ni a, dah hniam an harsa.

A tawi zawnga sawi chuan zanina Mizo club hmachhawn tur RKM hi group C-a team nem bera ngaih an ni a, Lalsangzuala Hmar hoten hnehna an chang zo lo a nih chuan playoff inpetkai a harsa sawt ang.