Cricketer of the Year atan Vikash Kumar

Cicket Association of Mizoram (CAM) chuan 2023 - 2024 season chhunga player che ṭhate chawimawina hun a hmang. Award ngaihhlut Men's Cricketer of the Year atan Vikash Kumar, Electric Veng thlan a ni.

Vikash Kumar hi keeper batsman niin, season liam ta khan Ranji Trophy leh 1st division tournament-ah run a siam hnem ber a ni. Tualchhung tournament lian Mahuma Memorial 1st Division Screening Tournament-ah half century vawi li leh century vawi khat a siam.

BCCI hnuaia tournament bikah chuan, Uttarakhand lakah ball 85 a hmachhawnah run 80 a siam a, BCCI hnuaia domestic tournament level sang berah half century vawi hnih - Arunachal Pradesh leh Meghalaya lakah a siam a ni.

Bawngkawn YMA Hall-a hun hmanah hian Johan Lalbiakkima, Ramhlun Venglai chu Junior Cricketer of the Year (Men) atan thlan a ni bawk. Johan-a hian Mahuma Memorial-ah Chinga Veng lakah run 62 siamin wicket li a la a, ‘Man of the match’ atan thlan a ni. Cooch Behar Trophy-ah Meghalaya lakah 1st innings ah run 73 & 2nd innings ah run 51* (not out) siamin wicket sarih a la bawk.