Goal 900 khung thei hmasa ber Ronaldo

Cristiano Ronaldo chuan footballer piang tawh zinga competitive match-a goal 900 khung tling hmasa ber record a siam. Portugal hian Ningani zan khan Nations League-ah Croatia 2-1 in an hneh a, Ronaldo hian goal pawimawh leh record siamna goal a khung.

Portugal hi Scotland bakah Poland leh Scotland te nen group khatah an awm a; September 8, Pathianni zan hian Scotland an mikhual leh dawn. Scotland hi an match hmasa berah Poland lakah 3-2 in an chak lo.

Portugal an chak

Lisbon-ah mualneitu Portugal-in bul an ṭan ṭha a, Bruno Fernandes-a'n Croatia goalkeeper Dominik Livakovic tan hna a siam. Manchester United wing back Diogo Dalot-a'n Fernandes ball pek chu box chhungah changin cool takin a pet goal. Dalot hi defender ni mah se a chet dan hi striker ṭha chet dan a ni a, box chhungah a rilru a fim hle.

Khelmual chhunga veteran player pahnih Luka Modric leh Real Madrid tana a khelhpui ṭhin Cristiano Ronaldo ten an chance neih hmasak an khung lo ve ve. Mahse, minute 34-naah inkhelh zawha sawi zui hlawh ber a thleng.

Mual vei lam aṭangin Nuno Mendes-a'n box chhungah ball a vawrhlut a, Ronaldo-a'n a pet goal. Portugal captain-in ball a zawng thiam a, kum lamah upa tawh mah se goal hmaa a hriam zia a lang.

Goal ṭhahnem tak khung tawhtu Ronaldo tan pawh goal 900-na chu a hlu tih a lang a, ṭum danga a goal khung lawm angin a lawm lo. A ban a phar chhuak a, a hmai hupin a ṭhingṭhi zui.

Croatia-in first half-ah siphurh an sut ṭhen a, vei lam aṭanga Borna Sosa cross chu Diogo Dalot-a'n dan tumna lamah an lamah a tilut. Luka Modric leh a ṭhianten beiseina thar an nei.

First half-ah goal thum lut tawh mah se goal dang a luh belh lo. Portugal-in chance an nei ṭha zawk a, Pedro Neto-a'n crossbar a pet per bakah Ronaldo khung tur keeper Livakovic-a'n a dansak. Croatia-in hun tawp lamah chance an nei a, Portugal an him hram.

Ronaldo a ropui

Ronaldo hian a career-a goal 900 a khung bakah hian ram tan goal 131 a khung a, tam tana goal khung tam ber record chu a belhchhah zel. Portugal captain hian an ram club Sporting Lisbon-ah football career ṭanin Portuguese club hi goal nga a khungsak hman.

Manchester United-ah Ronaldo-a'n hming a chher a, match 292 aṭangin goal 118 a khung. Chutihrualin Real Madrid a pan hnuah goal a khung thei lehzual a, match 438 aṭangin goal 450 a khung - a khelh zat aiin a goal khung zat a tam.

Real aṭangin Juventus a pan a, Turin club tan match 134 aṭangin goal 101 a khung. Italy aṭangin Old Trafford-ah a kir a, Man United tan match 54 khel lehin goal 27 a khung. Manchester ṭangin Al Nassr a zawm a, Saudi club tan hian match 74-naah goal 68 a khung.

Club career-ah hian match 1025 khel tawhin goal 769 a khung a, ram tan match 213 khelin goal 131 a khung. Competitive match 1238 aṭangin goal 900 a khung a, khum a harsa ang.

Tum sang Ronaldo

Record thar siamtu Ronaldo chuan, "Ka lo suangtuah ṭhin, suangtuah dang pawh ka la ngah. In zavaia chungah ka lawm e," tiin 'X' ah a ziak.

Nations League khelh hmain Ronaldo-a'n chawlh mai a la tum loh thu a sawi a, Portugal captain hi a tum a san miau avangin record sang pawh a la siam zel ang.

Ronaldo hian record ropui tak tak a hnutchhiah tawh a, a kalna apiangah top scorer a ni thei zel. England, Spain, Italy leh Saudi Arabia-ah te top scorer a ni thei a, a record hi a chhuanawm hle.