A sang pali zingah SYS

SYS FC-in LZ Juice MPL11-a match nga chhung chak hmel an hmuh loh hnuah nimin khan FC Bethlehem 1-0 in an hneh a, round 9 khelh zawhah Lunglei club hi a sang pali zingah an inhlangkai.

Nimin RG Stadium-a inkhelah hian goal chance tam mah se goal khat chauh a lut a, SYS forward Andreas Lalhmingmuana (V. Muana) chuan minute 72-naah vei lam ṭanga F. Malsawmtluanga cross chu a tauh lut. V. Muana'n a tauh ṭha takzet a, goal awmchhun khungtu hi man of the match-ah an thlang.

Lalmuankima hote hian goal khat chauh khung mah se vawi thum wood work an tih per a, goal tam zawk khung thei tur chu an ni. First half-ah defender Lalduhawma'n box pawn aṭanga goal ban pet perin second half-ah Lalruatsanga'n goal ban a pet per a, Ricky H. Vanlalhriatsanga'n crossbar a pet per bawk.

SYS hian goal chance ṭha an nei a, FC Bethlehem pawhin goal khung theihna remchang an nei ve tho. Lalhriatpuia Sailo hote hian chance ṭha an hlah hnem a, an hun ṭha neih an hman ṭangki loh avangin table mawngphah chhuahsanna remchang an bawhpelh - SYS ai mahin an ngah zawk ang.

Lalnunzira Sailo, Lalfamkima, Varun Tamang leh Samuel Lawmsiamkima ten ṭum khat aia tam chance an nei vek a, an elpui laka point hmuh loh hi season tawp lamah a pawi thei ang.