Police hmaah Rindika 'Chawnpui' an zawr

LZ Juice MPL11-ah coach Lalrindika Hmar a rawn kir a, an match hmasa berah chak nghal mah se Mizoram Police lakah erawh an tho chhuak thei lo. Lalbiaksanga Colney hoten Chawnpui hi 4-1 in an sawp.

Police-in point thum hlu tak an hlawhchhuah avangin point 13 an hmu a, pathumnaah dinhmun an sawhnghet. Chutihrualin Chawnpui hian goal chhuah tam deuh mahse, khel chhia an ni lo. Vanneih ṭum chu ni se chak thei an ni a, 2-1 a nih laia Silvana Lalruatkima penalty hlah an tuar, tiin a sawi theih.

Goal khat ve ve

Mizoram Police-in FC Bethlehem lakah match hnih aṭangin point khat chauh an hlawh chhhuak a, result ṭha duhin residential camp an nei. BS-a Colney hoten an thawhrim rah an seng a, vanneihna an keng tel.

Police-in bul an ṭan ṭha a, Isaac Malsawmkima'n penalty a hlawh chhuak. Mahse, tawnhriat nei ṭha BT-a'n a pet ṭha lo a, goalkeeper RVL Nunmawia'n (Buanga) a dansak. Minute 13-naah captain Lalfakzuala freekick chu na hran lo mah se goalkeeper Buanga'n a man thei lo a, ho takin goal-ah a lut - penalty meuh dangtu a chesual. Police-in goal an khung hma a, Chawnpui an buai phah lo.

Chawnpui game a mawi a, Rindika kut hnu a lang. Lalthanzuala (TZ-a), J. Lalbiakliana (Valpuia), Jessie Lalmawizuala leh C. Ramnunpuia (Tea Chinzah) te an ṭangkai a, langsar ber erawh Alex Ramdinthara ni a, Alex hi a ball sem a ṭha hle.

Vei lam aṭanga TZ-a cross chu Tea Chinzah-in hnai tak aṭangin khung lo mah se minute 33-naah Alex-a cross chu TZ-a'n a tauh goal. Goal luh hnuah Chawnpui game a dul a, inkhel thunun tawh loin an inhnehtawk ta thung.

Fakzuala show

Halftime-ah Police an infuih ṭha a, second half-ah bul an ṭan ṭha hle. Minute 48-naah freekick hmuin training ground-a an zir ang thlapin an tiah a ngaih theih a, a pettu Michael Lalbiaksanga'n a pet ṭha. I Day Football best player Michael hian kawh zetin goal kilah a pet lut.

Chawnpui an insiamrem a, Jessie ball vawrh luh chu substitute RM Zothansanga'n box chhungah ṭha taka la thlain goalkeeper R. Malsawmkima (Mana) lakah penalty a chawi a, Police keeper-in thutlukna dik a siam. Chawnpui tan bench aṭanga lut tho, Silvana a rawn pen chhuak a, Mana'n a dansak.

Mana'n kawng a sial a, goal hmasa ber khungtu captain Fakzuala a hmuhnawm zui. Fakzuala hian minute 78-naah mawi zetin a ball a rap let a, R. Malsawmtluanga'n ṭha zetin a pet lut. MPL best player pawh ni tawh MS-a a la thiam reng.

Chawnpui beiseina tihtawp nan Fakzuala bawkin box chhungah a tauh let a, MPL10 best player BT-a'n ṭha zetin a pet goal. Police-in talbuai lai nei bawk mah se goal li meuh an khung avangin nuam sa takin an chak.