Germany no. 1 thar Ter Stegen

Germany-in zanin dar 12:15 hian Merkur Spiel-Arena, Dusseldorf-ah Hungary an mikhual dawn a, hun rei tak goalkeeper no. 1 hna chelhtu Manuel Neuer-a'n ram tana inkhelh a chawlhsan tawh avangin Barcelona keeper Andre Ter Stegen chu number 1 tur a ni.

Germany no. 1 thar Ter Stegen chuan, "Number 1 nih hi ka tum ber a ni a, mahse kum 10 chuang chu ka tum angin ka awm lo. Mahse, ka hmaah Manuel Neuer a awm a, ani hian club leh ram tan sulhnu ropui tak a nei a, a hlawhtlinna avangin ka lawmpui. Chutihrualin keimah bikah chuan tun hma aṭangin ka tum a la ngai reng a, ram tan minute zawng zawng khelh a, theihna zawng zawng hlan chu ka tum a ni," tiin a sawi.

Euro 2024 zawhah Neuer bakah Toni Kroos, Thomas Muller leh Ilkay Gundogan ten ram tana inkhelh a chawlhsan a, tawnhriat nei player-te tel loin Julian Nagelsmann-a hote an inlan a ṭul dawn.

Captain Gundogan a chawl a, Bayern Munich midfielder Joshua Kimmich-a'n captain hna a chelh ang. Kimmich chuan, "Player mal angin kan khel dawn lo a, team angin kan khel dawn. Tawnhriat nei player-te an chhuak a, an hmun ruak hnawh khat tura kan pen chhuah a ṭul a ni," tiin a sawi ve bawk.