Koeman hnuaia khelh ka duh lo - Bergwijn

Steven Bergwijn chuan Netherlands tana a khelh tawh loh tur thu sawitu Ronald Koeman chu na takin a chhanglet a, "A hnuaia khelh ka duh tawh bik lo," a ti ve sak!

Bergwijn hian nipui transfer lai khan Saudi Pro League lam a pan a, hei vang hian coach Koeman chu a lawm lo hle. Netherlands boss hian vantlang hriatah Bergwijn chu ram tana a koh tawh loh tur thu a sawi zui.

Dutch forward-in ngawi renga thlir liam a harsat a, Barcelona boss hlui hnuaiah chuan khelh a tum tawh bik loh thu a sawi zui - Netherlands tana Bergwijn-a hma hun chu Koeman-a ban leh ban loah a innghat tawh tihna a ni ber!

Koeman chuan, "Bergwijn atan kawng ka khar tawh - ka rilru puthmang chu a hre sa a ni," a ti a, a player chu infiamna khawvela hlawhtlin aia sum chauh umah a puh a, a team-a tel turin a duh lo.

A bul ṭanna

Kum 26 mi Bergwijn hian September 2, Thawhṭanni khan Saudi Pro League club Al Ittihad chu Ajax aṭangin pound maktaduai 17.7-in a zawm a, kum khatah euro maktaduai kua vel a hlawh dawn niin khawthlang media-te chuan an tarlang.

Koeman hian UEFA Nations League khel tur a squad-ah a telh lo zui a, Dutch team hian zanin dar 12:15-ah Nations League khel turin Bosnia & Herzegovina an mikhual ang.

Dutch coach Koeman chuan, "Kum 26 mi lek i la nih chuan infiamnaa hma i sawn zel theih dan tur i ngaihtuah tur a ni a, sumin a tibuai tur che a ni lo. Kei chuan Barcelona tana ka khelh theih avangin hetiangah hian buaina ka nei ve lo.

"Ani pawh Ajax tana khel zel thei a ni a, chu chu a ṭha tawk a ni lawm ni? A duhthlanna kan zahsak tur a ni a, kei erawh chuan ka ngaihdan ka sawh sawn dawn lo a ni," a ti a, Tottenham Hotspur forward hlui hi koh chhunzawm a tum hmel loh hle.

Khel lo ang!

Koeman-a ṭawngkam a na a, Bergwijn-a'n insum a tum bik lo. PSV Eindhoven aṭanga a professional zinkawng zawh ṭantu chuan, "Koeman-a hnuaia khelh châkna hi ka nei tawh lo a, media hmaa heti taka min beitu enkawlna hnuaiah hian ka khel dawn lo.

"A duh chuan min biain, ka thutlukna siam chhan pawh min zawt thei a, min be miah loin khatiang khan engtin nge a sawi theih zawk? National coach, mahni mawhphurhna ngai pawimawh mi a nih chuan min call hmasa tur a ni," a ti.

Bergwijn chuan sawi zawmin, "TV kaltlangin engkim ka hria a, a hnuaiah khan hun hlimawm tak tak ka lo tawng nual tawh - hetianga a ṭawng ta mai hi mak ka ti a, a chungah ka lawm lo hle a ni," a ti a, a coach a dim bik lo.

Netherlands tan vawi 35 inlana goal riat khungtu Bergwijn hian ram tana a match hmasa ber chu Koeman hnuaiah hian a khel a, a international career tawpna pawh Koeman tho a ni lo ang tih a sawi theih loh.

Ṭawng duh!

Koeman hi coach che danglam tak a ni ṭhin ve hrim hrim - Barcelona a enkawl lai khan club legend Luis Suarez chu phone call tawite hmangin a mamawh tawh loh thu a hrilh a, Uruguayan striker hian a la na hle a nih kha.

Tunah Bergwijn a mamawh loh thu a sawi leh ta a, hemi hma hian Ajax striker Brian Brobbey thiamna chu a san tawk loh thu a lo sawi tawh bawk! Bergwijn chuan he thu pawh hi rawn sawi chhuak lehin, Koeman beih nan a hmang.

Bergwijn chuan, "Brobbey chungchang pawh mipui vantlang hriatah ual au takin a lo sawi tawh a, amah ngei pawhin a thil tih chu a ṭhat loh thu a lo sawi tawh a nih kha," a ti a, a inchhir lehna tur thu sawi mai mai ṭhinah Dutch coach chu a puh.

Season hmasaa Ajax tan match 31 a khelha goal 13 khungtu Bergwijn chuan sawi zawmin, "A khawsak dan hi mahni player-te ngei chunga chet dan tur a ni lo a, hetianga a che chhunzawm zel a nih chuan tuman an ring zo lo mai ang," a ti - amah chuan a ring ta lo phawt!