Champion lai Bayern hmaah Atletico

UEFA Champions League champion lai Bayern Munich-in zanin dar 12:30 hian Allianz Arena-ah Atletico Madrid an mikhual dawn. Group B inkhel dangah zanin dar 10:25-ah Salzburg leh Lokomotiv Moscow te an inkhel ang.

Bavarians-in kartawp Bundesliga inkhelah Arminia Biefeld 4-1 in an sawp a, Atletico-in Celta Vigo lakah 2-0 in hnehna an chang ve bawk. Hansi Flick-a hote hian nomawi humhim an tum dawn a, Champions League hming a put hnuah Real Madrid-in 2016 aṭanga 2018 chhung an champion tih loh chu nomawi humhim thei an awm lo.

Bayern Munich-in Pep Guardiola an lakluh chhan kha Champions League an duh vang a ni a, Spanish manager hian Bavarians beiseina a tih hlawhtlinpui lo. Pep-a hnuaiah Bayern-in semifinal vawi thum lutin Spanish club vek an hneh lo a, zanina an hmachhawn tur Atletico Madrid pawh hi an tel.

Kum 2016 semifinal-ah Atletico hian an mualah 1-0 in an hneh a, Allianz Arena-ah Bavarians 2-1 in chak mah se Spanish club hi away goal rule hmangin an vannei ta zawk. 2016-17 season-ah pawh team pahnih hi group khatah an awm dun a, anmahni mualah 1-0 ve vein hnehna an chang.

Bayern-in Allianz Arena-ah Atletico vawi hnih an hmachhawnah an la hneh ve ve a, tun hnaia an khelh dan thlir telin Hansi Flick-a hote hi chak zawk tura ngaih an ni. 

Manchester City aṭanga an lakluh Leroy Sane-a'n training zawm leh tawh mah se Atletico hmachhawn turin a la inpeih lo. Chutihrualin goal nawr kawnga player pawimawh dang Robert Lewandowski, Thomas Muller, Serge Gnabry leh Kingsley Coman te an dam ṭha.

Lewandowski-a'n season liam ta ang thoin goal khung hna a chhunzawm a, Muller pawh a che ṭha chhunzawm zel. Tun hnaiah Germany team an chet ṭhat loh avangin Muller hming an la ri zing hle.

Bayern midfielder hlui Bastian Schweinsteiger chuan, "National team coach chu ni ila, Muller chauh ni loin Boateng pawh ram tana khel turin ka ko ang. Thil awm dan han thlir zel ila, a khelh leh ngei ka beisei," tiin a sawi a, Joachim Low-a'n a ngaihdan a thlak theih nan Muller-a'n Champions League-ah pawh hming a chher zel a pawimawh.

Bayern Munich hian an match hnuhnung bera Arminia Biefeld nen an inkhelh ṭumin second half an khel ṭha lo a, Bundesliga-ah pawh September thla khan Hoffenheim lakah 4-1 in an tlawm. Bavarians tlarhnung a phui lo a, Hansi Flick-a'n goal venhim a ngaih pawimawh a ṭul.

Goalkeeper Manuel Neuer chuan, "Atletico hi team ṭha an ni a, khelhpui an harsa. Chutihrualin inpuahchahna hun ṭha ka nei thei a, result ṭha tak kan hlawhchhuah ka beisei," tiin a sawi.

Bayern player pawimawh Joshua Kimmich chu a nupuiin fa pahnihna a hrin sak hnaih avangin kartawp inkhelah a tel lo. Hansi Flick chuan, "Joshua hi player pawimawh tak a ni a, Atletico nen a inkhelh theih ka beisei," tiin a sawi a, Kimmich a awm chuan Bavarians tlarhnung chauh ni loin tlarhma a phui phah thei ang.

Bayern khingpui tur Atletico Madrid hi Diego Simeone enkawl an nih avang ringawt pawhin an khel en a châkawm a, tun season-ah phei chuan Diego Costa leh amah ang bawka kawlh Luis Suarez te an awm. 

Amaherawhchu kartawp khan Costa hi malpui hliam avangin thlak a ni a, Bayern nen hian a inlan hman lo ang. Spain international forward Costa aia lut tur hian Joao Felix a awm nghal a, midfield-ah Saul Níguez, Koke, Marcos Llorente leh Yannick Carrasco te an awm avangin Bavarians tan a awlsam dawn lo.

•    Group Stage-ah hian team 32 an awm. 

•    Group tin aṭangin team pahnihin knockout stage an lut ang.

•    Pathumna hian Europa League knockout stage an khel ang.

•    Group Stage hi December 9-ah khelh zawh a ni ang.

•    Round of 16 : 1st leg : 16/17 & 23/24 February; 2nd leg: 9/10 & 16/17 March

•    Quarterfinal : 1st leg : 6/7 April; 2nd leg : 13/14 April

•    Semifinal : 1st leg : 27/28 April; 2nd leg : 4/5 May

•    Final hi May 29-ah Atatürk Olympic Stadium, Instanbul-ah khelh a ni ang.

•    Group inṭhenhran dan

Group A:    Bayern, Atlético Madrid, Salzburg, Lokomotiv Moscow

Group B:    Real Madrid, Internazionale, Borussia M'ladbach, Shakhtar Donetsk

Group C:    Manchester City, Porto, Olympiakos, Marseille

Group D:    Liverpool, Ajax, Atalanta, Midtjylland

Group E:    Chelsea, Sevilla, Rennes, Krasnodar

Group F:    Borussia Dortmund, Lazio, Zenit, Club Brugge

Group G:    Dynamo Kiev, Juventus, Barcelona, Ferencváros

Group H:    PSG, Manchester United, Leipzig, Istanbul Basaksehir