A ṭhianten Di Maria an thlah

Angel Di Maria-a'n ram tana inkhelh a chawlhsan tawh a, nimin zing khan Argentina leh Chile tan World Cup qualifier an khelh chu a hmunah kalin a ṭawiawm, a ṭhiante chuan thlahna hun an lo hmang a ni.

Kum 36 mi Di Maria hian Argentina tan match 145 a khelh aṭangin goal 31 a khungsak a, inelna lian leh pawimawh hrang hrang - Olympic, Copa America, World Cup leh Finalissima-ah te hlawhtlinna a chanpui vek.

Inthlahna thu sawiin Di Maria chuan, "Ka rilruah hian sawi tur tam tak a awm, sawi chhuah vek sen pawh a ni lo. Argentina Football Association tana thawktu zawng zawng chungah ka lawm, anni ho nen hian kum 16 chhung hun kan hmang.

"Hun harsa leh hrehawm hrang hrang ka paltlang puite an ni a, ka nuna hun hlimawm leh ropui ber ka tawn puite kha an ni bawk. Ka tan chuan theihnghilh theih chi an ni dawn tawh lo.

"Argentina tan ka inkhel dawn tawh lo a, mahse kan ram team hi ka thlawp chhunzawm zel dawn thung. Copa America leh World Cup khelhna hmunah te pawh kei leh ka chhungte chu a entu leh kan ram ṭantu rinawm kan ni zel ang," a ti.

Di Maria hian final pawimawh hrang hrang Olympic, Copa America, World Cup leh Finalissima-ah te goal a khung vek a, an ramin hlawhtlinna an chan theih nan a thawh hlawk takzet.

Argentina captain Lionel Messi chuan thlahna thu sawiin, "Hun rei tak kan inzui a, sawi tur kan neih leh sawi ngai dangte chu kan sawi zo vek tawh a nih kha, tun hun hi nang leh i chhungte nen hlim taka inhman ngei ka beisei. Kan ngai dawn khawp mai che a, kan inhmu thuai dawn nia," a ti.

Nimin zing inkhelah hian Argentina hi 3-0 in an chak. World champion tan hian Alexis Mac Allister, Julian Alvarez leh Paulo Dybala te chuan goal khat ṭheuh an khung a, hliam vangin Messi chu inkhel tura koh zingah hian a tel ve lo.