Beiseina neitu Marquez

Marc Marquez chuan Pathianni zan tir dar 5:30-a tlan tur San Marino Grand Prix atan beisei a neih thu a sawi a, tun hnaia result ṭha a neih chu chhawm nun ngei tumin a bei dawn a ni.

Intlansiak an neih hnuhnung berah Marquez hi a chak a, bike intlansiakna sang berah hian kum thum chhung zet a nghah hnuah chak ni hmel a hma ve leh chiah, a tan a hlu danglam hle ang tih a chiang.

Kum 31 mi Marquez chuan, "Intlansiakna khawvelah chuan thil sawi lawk hi a harsa thei em em a, tun kar tawpah pawh eng nge thleng dawn rin thiam a harsa, kei leh ka team erawh inelna hmachhawn turin kan inpeih," tiin a sawi.

Rider championship lamah Marquez hi pathumna a ni mek, a chungah Francesco Bagnaia leh hmahruai mektu Jorge Martin te an awm, an inkar a zau deuh tawh avangin Marquez tan champion beiseina erawh a tam tawh lo thung.