Real-in loan-in Jovic chhuahtir dawn?

Spanish champion Real Madrid chuan an club a beisei phak lo Luka Jovic chu loan a chhuahtir an tum dawn niin Spanish media-te chuan an tarlang a, Serbian striker hi AS Roma, Inter Milan leh AC Milan-te chuan lakluh an duh vek. 

Kum 22 mi Jovic hian 2018-19 season khan Eintracht Frankfurt tan a hming a chher a, Bundesliga club tan hian inelna hrang hrangah match 48 khelin goal 27 ngawt a khungsak. June 2019 khan beiseina sang tak nen Real Madrid hi a zawm a, a man zat hi euro maktaduai 60 niin kum ruk chhung atan contract a ziak. Mahse, beisei angin Santiago Bernabeu-ah a khel zui lo a, season hmasa khan inelna hrang hrangah match 28 khelin goal hnih chiah a khungsak. 

Jovic hi AS Roma chuan an hnaih ber nia sawi a ni a, Real hian an player hi loan hmanga an chhuahtir dawn a nih chuan an chinfel ran a ngai ang - October 5-ah transfer bazar khar a ni dawn. La Liga 2020-21 season a match hnih an khelh aṭanga point hnih chiah la nei Real Madrid hi zanin dar 1:00-ah an inlan dawn a, khualmualah Real Valladolid an lenchilh ang. Pathianni zana 6-1 a Getafe sawptu Atletico Madrid chu zanin dar 10:30 hian an inlan dawn a, khualmualah Huesca an lenchilh ang - Getafe laka goal hnih khungtu Luis Suarez chu thlir bik tur a ni leh dawn.