Australian Open khelh hun an sawn

Mipa tennis thuneitu sang Association of Tennis Professionals (ATP) chuan season thar hman ṭan dan tur a chhawp chhuak a, inelna lian zinga neih hmasa ber tur Australian Open chu a hun pangngai aiin chawlh kar thuma sawn tlai a ni dawn.

Ruahman lawk dan chuan Australian Open 2021 hi January 18-31 chhunga khelh tur a ni. Mahse coronavirus vangin beisei leh tum angin a kal theih loh fo a, tennis inelna pawh a la nghawng chhunzawm dawn a ni.

Tennis Australia leh sorkar thuneitu lam chuan tournament sawn chungchang hi an la sawi chiang ve lo thung. Amaherawhchu ATP berin calendar a tih chhuah tawh avangin tournament hi February 8 a khelh a ni dawn tih chu a lang chiang.

ATP-in kalpui a tum dan chuan Australian Open khelh tum player-te chu January 15 hian Melbourne khawpuiah an thleng ang, sorkar inkaihhruaina angin ni 14 chhung khung hran an ni ang. Quarantine lai hian an training thei dawn tho a ni.

Tennis season thar hi January 5 aṭanga khelh ṭan a ni dawn. United States-ah Delray Beach Open an khel ang a, Turkey lamah Antalya Open an khel ve thung ang. Doha lamah tournament awm lehin chumi hnu lamah chuan Melbourne an pan ang.

ATP chairman Andrea Gaudenzi chuan, "Buaina leh harsatna hrang hrang karah 2021 season hman dan tur ruahmanna chu tih chhuah a ni ta a, kumina kan kal ang bawkin mipui himna leh hriselna chu kan ngaih pawimawh hmasak a ni ang," a ti.