Hurri 'Kane' thlipui in Italy a nuai zo lo

FIFA World Cup 2014-a hma taka an tlak hnuin England in hneh loh an la tawng lo a, Thawhlehni zan khan Italy nen friendly match Turin khawpuiah an khel a, goal khat ve ve khungin an inhnehtawk.

Juventus Stadium-a inkhelah hian Italy tan Graziano Pelle chuan goal hmahruai a khung a, second half-ah England tan Andros Townsend chuan a sut.

Inkhel ṭan tirh aṭangin team pahnih an in hlau lo tawn a, goal a hlauhawm hmasa zawk erawh Italy an ni. Marco Parolo chuan minute 10 na lekah England goal a rawn rum ṭhaih nghal a, mahse England keeper Joe Hart chuan ṭha takin a lo nam over hman hlauh.

England goal hmaah Italy an hlauhawm chhunzawm a, Brazil a piang Italy tana khel Eder-a'n England tlar hnung a chhaih buai zeuh zeuh. Minute 29 naah goal kan hmu ta nge nge a, goal khungtu chu Italy an ni. Giorgio Chiellini chuan Phil Jones mawi taka a bum hnuah Southampton striker Graziano Pelle tan ball a chip lut a, harsatna awm lo in Italian striker pasang hian goal-ah a lo chan tir. Inkhelh chawlhlawk hma in inhliam vangin England defender Chris Smalling chu lakchhuah a ni a, Michael Carrick chuan a rawn thlak. Italy in 1-0 in hma an hruai a, goal dang luh belh tawh lohin chawlh lawk an hmang.

Second half an ṭan a, goal phur England aiin Italy an hlauhawm leh zawk. Sampdoria striker Eder chuan England tlar hnung a chhaih buai leh a, mahse a goal shot ṭha tak chu Joe Hart-a'n ṭha tak tho in a lo dang. Goal hmahruai khungtu Pelle chuan goal khung na hun ṭha nei leh mah se a pet out hlauh.

Hemi hnu lawk hian England in chance ṭha an nei a, mahse England tana a game khelh tluan hmasak berah Harry Kane-a'n goal a khung thei lo a, a ball shot chu an lo dang out. Hemi hnu lawk hian England captain Wayne Rooney shot chu ṭha takin Gianluigi Buffon chuan a lo dang. Rooney hian crossbar a pet per bawk.

England in an beidawn duh loh rah an seng a, Totten­ham player Townsend chuan minute 79 naah kawh pawtin a rawn pet goal. Goal dang luhbelh tawh lohin 1-1 in an ṭin.

Kane a langsar lo

English striker Harry Kane-a'n kar hmasa a Lithuania 4-0 a an sawp ṭumin England tan a game hmasa ber substitute aṭangin a khel a, goal khat a khung. A game hnihnaah bul ṭan tir a ni a, goal a khung lo mai ni lo in beisei angin a khel chhuak lo.

Team pahnih an inhnehtawk a, second-half a England inkhel a hmuhnawm hle. Inkhelh chhung zawngin vawi 126 zet ball an in pass dik a, an in pass dikna zat hi Italy aiin vawi 42 zet in a tam zawk.

World Cup zawh hnua England an inkhelh vawi riatna niin chak loh hmel an la hmu lo a, vawi sarih an khingpuite hnehin Italy an hnehtawk hi an chak zawh loh vawikhatna a ni.

Italy tana goal khungtu Southampton striker Gra­ziano Pelle hian tunhnaia Italy match thumah goal hnih a khung tawh. England goalkeeper Joe Hart chuan ram tana a vawi 50 khelhna a hmang chiah a, England goalkeeper zinga vawi 50 ram tana inkhel thei parukna a ni.

August 2013 hnuah Italy in an khelmualah hneh loh an la tawng lo a, vawi nga an khingpuite hnehin vawi nga an inhnehtawk pui a ni. An inkhelh hnuhnung vawi 13-ah goal kua chiah an la chhuah bawk.

Eng nge an sawi?

England manager Roy Hodgson chuan, "Kan khelh danah ka lawm a, draw result hi result ṭha tak a ni. First half kha kan khel chhe takzet a, ka beisei angin kan khel chhuak lo. Mahse, second half-ah kan theihna tak tak kan pholang ṭan a, kha khan min ti lawm hle a ni," a ti.

Kane chungchang sawilangin Hodgson chuan, "Khawvela defending ṭha ber pawl team kan khel a, tawnhriat nei ngah tak tak player an ni hlawm bawk. Kane khan ka ngaihdanah chuan a khel ṭha hle a ni," a ti.

Italy coach Antonio Conte chuan, "Team ṭha leh khauh tak kan khelh avangin kan khelh dan khan min ti lawm hle a ni. Ka player-te thawhrimna leh taimakna kha min ti lawm ber tu chu a ni. A bik takin first half-ah kan khel ṭha em em a, second half erawh kan chau deuh tawh niin a lang," tiin a player te khelh danah a lawm tawk thu a sawi.

Juventus coach leh player hlui ni bawk Conte chuan, "Kan khelhna Juventus khelmual khan ka lung a ti leng tak zet a, ka tan chuan he hmun hi hmun danglam bik a ni," tiin a lunglen thu a sawi lang.