Sawizui hlawh Saina Nehwal
World number 1 anih hnuah India badminton star Saina Nehwal-i chanchinin sawizui a hlawh zel. India ramah chuan infiammi zingah Cricket star an langsara, tuma elrual loh an ni. Mahse tunlai India infiammi zinga sawi hlawh ber leh lar ber tih ngam chu Saina a ni.
Kum 25-a upa Hyderabad nula hian dai ngai loh ram min dai puiin fan ngaih loh ram min fanpui mek a ni. Tunhmain India badminton player zingah World number 1 an la awm ngai lo a, mahse tunah chuan an awm ta. He thulawmawm hian India ram pum a fan chhuak mek zel a ni.
India Prime Minister Narendra Modi chuan, "A thiamna leh theihna hian kan ram a chawimawi hle a ni. World number 1 a ni thei hi ika lawmpuiin ka chhuang takzet," tiin a sawi.
Cricket sawi apianga kan rilrua lo lang hmasa ber te zinga mi Sachin Tendulkar chuan, "Indian zingah hetiang dinhmun luah thei hmasa ber a ni hi ka lawmpuiin ka chhuang hle a ni. Kan ramah chuan infiammi zingah kan entawn tur ber pakhat a ni reng tawh ang," tiin a lawmpui zia leh a chhuan zia a sawi bawk.
World number 1 Saina chuan, "Nikumah khan World number 7 ka ni a, mahse thla sarih chhung lekin hetiang dinhmun ka thleng thei hi rin a har zawk hial a ni. He dinhmuna min hlangkaitu mi pawimawh tak pakhat a awm a chu chu ka coach Vimal Kumar a ni. Ani hi ka tana mi pawimawh ber te zinga mi a ni hial ang," tiin a sawi.