I League-ah Thuammawia a vul

India rama football inelna sang ber Hero I League-ah Mizo tlangval Lalthuammawia a che ṭha a, Bengaluru FC -in Sal­gaocar leh Sporting Club de Goa an hneh ṭumin match of the match a thlan ve ve a ni.

Thawhlehni zan khan Bengaluru-in Sporting Club 4-1 in an hneh a, Royal Wahingdoh-in 1-0 in East Bengal an hneh bawk.

Bengaluru hi I League champion lai a ni a, tun season-ah Shillong Lajong aṭangin keeper Thuammawia leh F. Lal­chhuanmawia te an la lut a. Anni pahnih bakah hian Mizo player awmsa Beikhokhei Beingaichho te chu player pawimawh vek an ni.

India captain Sunil Chettri-a khelhna club hian vawi 11 khelhah point 20 an hmu tawh a, pahnihna an ni. Zirtawpni zan hian anni ang bawka point 20 hmu tawh Mizo tamna Royal Wahingdoh an hmachhawn dawn. Tuna I League hmahruaitu chu Jeje Lalpekhlua khelhna Mohun Bagan an ni a, an hnuaia awmte aiin vawi hniha khel tlemin point 21 an hmu tawh.

Tunge Thuama?

Champhai Vengthlang tlangval Thuama hi RC Lalzuithanga leh Lalram­hluni te fapa a ni a, Mizo goalkeeper zingah chuan a thlen chin hi a sang hle. Feet ruk leh inches 10-a sang Thuama hian kum 2005 khan Subroto Cup-ah Mizoram aiawhin a tel a, first keeper a chang pha lo.

Champhai tlangval hi a beidawng mai lo, 2006 National U16-ah chuan Mizoram first keeper a ni tawh. Hemi ṭum hian Chanmari FC tana khel mek Malsawmfela leh F. Lalrinpuia te bakah Aizawl FC player David Lalrinmuana, R. Mal­sawmtluanga leh Lalro­zama te nen an khel ho a, final-ah West Bengal hneh loin an tlawm.

2008/09 season khan Mizoram Football Asso­ciation kaltlangin Shillong Lajong a zawm a, Shillong club hi I League-ah an kai pui a, season hnuhnung berah chuan first choice keeper a ni.

Season ṭan tirh khan Bengaluru a zawm a, assistant coach Pradyum Reddy hi Shillong Lajong-a Thuama lo enkawl tawhtu a ni. Mizo tlangval hian Bengaluru champion puitu keeper Pawan Kumar chu season hmasa berah a nek chhuak nghal a; I League, AFC Cup leh Federation Cup-a Bengaluru match zawng zawngah Thuama'n a veng fai vek.

Champion inbeisei

Thuama chuan Vanglaini palai hrilhin, "Coach-te'n ka chungah rinna an nghat a, ka lawm khawp mai. Bengaluru inenkawlna hi a fel fai a, an professional khawp mai, club dang nena khai­khin chiah pawh ka ruat lo," tiin club inrelbawl dan a fak.

Lajong keeper hlui Thuama chuan, "Professio­nal player kan ni a, chu­tianga awm tur chuan min beisei a ni. Kan zalen a, chutihrualin fine (pawisa chawi) theihna tur thil hrang hrang a awm a, fat test te kan nei ṭhin a, chutianga tling lo chuan pawisa an chawi ṭhin," tiin a sawi a, fine a la neih loh thu sawi tel bawk.

Champion chungchang sawiin Bengaluru keeper chuan, "Inkhelh tur a la tama, kan champion theih hi kan la ring tlat. Theithawp chhuahin kan khel zel ang," a ti.