Fellaini-a'n Belgium chak pui

Belgium-in Euro 2016 khel turin an dinhmun an sawhnghet zel a, Thawhṭanni khan Israel chu 1-0 a hnehin Euro qualifying group B-ah hmahruaitu an ni.

Jerusalem-a inkhelah hian Belgium lamin goal an khung hma a, inkhel ṭan aṭanga minute 9-na lekah Manchester United midfielder Marouane Fellaini chuan Belgium tan goal a khung a, United midfielder hi tunhnaiah a khel ṭha thei hle a, Inrinnia Cyprus 5-0 a an sawp ṭumin goal hnih a lo khung tawh bawk.

Belgium-in inkhel thunun zui mah se chance erawh an insiam hleithei lo a, halftime-ah 1-0 a ni.

Second half an khel a, Bel­gium aiin Israel in bul an ṭan ṭha zawk. Inkhelin minute 60 a pel ṭan tihin Maccabi Tel Aviv player Eran Zahavi chuan chance ṭha zet vawi hnih a rawn nei a, mah se Chelsea keeper Thibaut Courtois-a'n goal a chhuah duh tlat lo.

Minute 64 naah Belgium captain Vincent Kompany chuan yellow card vawi hnihna a hmu a, hnawhchhuah a ni. Hemi hnu lawk hian Dutch club Willem II striker Ben Sahar chuan Israel tan chance a rawn nei leh a, mah se Chelsea keeper Courtois chet ṭhat zan a ni a, Israel-in goal an khung thei lo.

Goal dang lut tawh loin inkhel a tawp a, 1-0 in mikhual Belgium a chak zawkah an ṭang ta a ni.

Belgium hi vawi nga inkhelh tawhah Wales nen point 11 ve ve hmu in goal difference-ah an sang zawk a, Group B hmahruaitu an ni mek. Israel hian point kua hmu in pathumna an ni a, an chunga team pahnih an phak lohna hi point hnih chauh a ni.

Euro qualifying group hi group riatah ṭhen niin group khata a sang ber pahnih zelin France rama nghah tur Euro 2016 an khel dawn a ni.

Belgium tan Kompany red card hi a pawi thui thei. June thlaa Wales nen group hma­hruaitu nih an inchuh hunah a inlan thei dawn lo.