Rio Olympic 2016 GB football team tel lo tur hi a pawi - FA

Football Association chuan 2016 Rio Olympics-a Great Britain-in football team a nei ve lo tur chu pawi an tih thu an puang.

English FA chuan mipa leh hmeichhe team-ah neih ngei an duh a, amaherawhchu Great Britain ram dangin an ṭawmpui lo.

FA thupuangtu chuan, "Player-te'n tawnhriat ṭha zawk neihna hun ṭha tak kan bawhpelh hi a pawi hle a ni. Great Britain ramte hian kan hun ṭha neih hman ṭangkaina chang kan hre lo a ni," tiin an lungawi lo hle.

Thawhṭanni khan FA Olympic-a tel rawtna chu ram dangin a thu phungin an duh loh thu an ti chiang. London 2012-ah khan Great Britain hian mipa leh hmeichhe team an nei a, quarterfinal an paltlang zo lo ve ve.

Manchester City hmei­chhe team player Natasha Harding chuan, "Welsh ka ni a, Olympic-a Great Britain aiawhna hun remchang a awm a, chu chu kan duhthusam a ni. Mah se tunah chuan kan beiseina chu lak boin a awm ta si," tiin twitter-ah a ziak. City forward hi ram tan vawi 39 a inlan tawh.

Wales captain hlui Jess Fishlock chuan, "Kan tel lo tur hi mak ka ti lo. FA hian an tel duh lohnaah hian chhan an nei a, an ṭanna hi ka ṭawmpui. Chutihrualin player-te hmakhua kan ngai a nih chuan thutlukna dik lo a ni. Olympic hi hmeichhe tan chuan World Cup ang tho a pawimawh a ni," tiin an tel lo tur chu pawi a tih thu a sawi ve bawk.