Vawi 500 chak thei Murray

British number 1 Andy Murray chuan Miami Open last 16-ah a khingpui Kevin Anderson hnehin Tennis a khelh hun chhungin vawi 500 a chak tling a, mel lung pawimawh tak a phun thei ta.

Seeded pathumna Murray hian vawi 500 chak hmel hmu turin a khingpui hi awlsam takin a hneh mai bik lo a, 6-4 3-6 6-3 in a hneh.

Tennis player zingah vawi 500 chak thei hi player 46 chiah an la awm a, chung zinga mi pariat chu la khel lai mek zinga mi an ni a. Midang 38 chuan tennis khelh an chawlhsan vek tawh a ni.

Kum 27-a upa Murray hian vawi 500 chak tling tur hian kum 10 chhung a mamawh a, kum 2005 khan professional game hmasa ber chu khel ṭanin tun dinhmun hi a inhlangkai ta a ni. Kumin March tir lam khan a hnampui Tim Henman record vawi 496 chak chu a lo khum tawh.

Tennis khel lai zingah chuan Roger Federer a ropui fal hle a, vawi 1012 zet chak tawhin Nadal-a'n a dawt a, vawi 721 a chak tawh thung. Kum 1996 a Tennis chawlhsan tawh, ṭum nga zet US open champion ni thei Jimmy Connors kha khawvela chak hnem ber a ni a, vawi 1,253 zet a chak thei a ni.

Murray chuan, "Hliam vangin harsatna ka tawk ve neuh neuh ṭhin. Chuti chung pawha hetiang hun ka thleng thei hi ka lawm a ni. Hei hian phurna thar min pein ka hmalam hunah chak zel duhna thinglung ka neih phah ngei ang," tiin a sawi.

Tennis player khel lai meka chak tamte

Player Chak zat

Roger Federer 1012

Rafael Nadal 721

Novak Djokovic 625

David Ferrer 623

Lleyton Hewitt 612

Tommy Haas 561

Tomas Berdych 506

Tommy Robredo 505

Andy Murray 500