Hneh theih loh Man City?

Leicester City-in kartawp khan Manchester City 5-2 in an sawp a, amaherawhchu League Cup-ah erawh Pep Guardiola hote hi hneh theih loh ang maia record nei ṭha an ni. Man City hian League Cup last 16 khel turin Turf Moor an tlawh dawn a, zanin dar 11:30 hian Premier League club Burnley an hmachhawn ang.

Manchester City hian October 26, 2016 khan League Cup fourth round-ah Manchester United an hneh lo a, hemi hnu hian League Cup inelna bikah hneh loh an tawng tawh lo. Pep Guardiola hote hian season thum chhung a zawnin League Cup nomawi an chawi tawh a, tun hnai bikah inelna an thunun hneh hle.

League Cup-a record nei ṭha ber chu Liverpool an ni a, vawi 12 final lut tawhin vawi riat an champion tawh. Chutihrualin Reds champion hnuhnun ber chu 2011-12 season daih tawh kha a ni a, hemi hnu hian Manchester City hi vawi nga an champion.

Man City hian tun hmaa vawi hnih nomawi an chawi tawh nen vawi sarih an champion tawh a, Liverpool record nih rual turin vawi khat chiah champion a ngai tawh. Reds hi 1981 leh 1984 inkar khan a zawnin vawi li an champion a, Pep Guardiola hote hian kuminah nomawi an chawi thei a nih chuan Liverpool record ṭha tak hi an nihrual bawk ang.

Chutihrualin kartawp Premier League thlir kir chuan Man City hian ball possession 72% nei chungin Leicester City lakah goal nga an chhuah a, Pep Guardiola-a'n tlarhmaah Sergio Aguero leh Gabriel Jesus te hliam vanga a chhawr theih loh bawk avangin chesual thei reng an ni.

Pep Guardiola-a'n League Cup aiin Inrinni zana a manager ngaihsan Marcelo Bielsa kaihhruai Leeds United nena an inkhelh tur a ngaih pawimawh zawk a rinawm a, Burnley nen academy player a chhawr tam a nih pawhin a mak lo ang.