Magpies leh Villa ten Wilson an inchuh

Newcastle United chuan Aston Villa hel lai striker Callum Wilson lakluh an tum a, Bournemouth striker hi Villa chuan lakluh tumin pound maktaduai 21 bawr velin an lo dawr tawh. 

Magpies hi Wilson lalut turin dinhmun ṭha zawkah an ding nia sawi a ni a, Newcastle manager Steve Bruce chuan England striker hi Cherries tana a khelhpui ṭhin Ryan Fraser nena khel dun leh turin a duh. 

Newcastle hian Fraser pawh hi free transfer-a lalut turin indawrna an neihpui mek a, he thu ziak i chhiar meuh chuan an inlalut fel tawh hial mai thei. 

England tan vawi li inlana goal khat khungtu Wilson hian season hman zawh takah khan Cherries tan inelna hrang hrangah match 39 khelin goal kua a khung a, a chhuak a nih chuan tun nipuia Bournemouth player langsar chhuak pathumna a ni ang. 

Premier League  aṭanga tla hlim Bournemouth player zingah Nathan Ake chuan pound maktaduai 41-in Manchester City a zawm a, goalkeeper Aaron Ramsdale chuan pound maktaduai 18.5-in Sheffield United a pan bawk. 

Liverpool-in lakluh tuma an hel hnua an tlawmsan tak Jamal Lewis pawh Magpies zawm thei dinhmunah a ding mek a, Norwich City leftback hi an lalut a nih chuan pound maktaduai 20 an seng ang. 

Villa manager Dean Smith-a’n season liam taa season chawhnu lama buaina an tawn ang tawh nawn a duh lo a, Wilson lam a hawi. Cherries striker hi an lalut thei lo a nih pawhin Brentford striker Ollie Watkins lam an hawi a rinawm. 

Kum 24 mi Watkins hian season hman zawh takah khan Brentford tan inelna hrang hrangah match 50 khelin goal 26-a khung a, mahse Premier League playoff final-ah Fulham an ngai lo. English top flight football khelh a châk dawn avangin Villa pan a hnial lo ang.