Arsenal khelmuala lenglut tur Liverpool

Zaninah Premier League match inkhel hmuhnawm hmuh tur a awm dawn a, tunhnaia Man­chester United hneh lotu Liverpool leh tun­hnaia rawn che ṭha tak Arsenal te an inkhel dawn.

Emirates stadium-a inkhel tur hi Champions League luh inchuh inkhel anga ngaih theih a ni. Liverpool in an khelh ṭhat tluan lai takin an match hnuhnung berah United an hneh zo lo a, season tharah Champions League khelh an tum a nih chuan Arsenal lakah chak loh a thiang tawh lo. Liverpool hi table-ah panganaah an awm mek.

Tunhnaiah Arsenal an che ṭha a, an match hnuhnung parukah chak loh hmel an la hmu lo. An chak loh hnuhnun ber chu February thla khan a ni tawh a, khualmualah Tottenham Hotspurs 1-2 in an hneh lo. Liverpool hi an hneh thei a nih ngat chuan Champions League bakah champion sawi ngam tur an ni.

Arsenal hi table-ah pathumna ni mekin hmahruaitu Chelsea an phak lohna hi point sarih chauh a ni a, an chak a nih ngat chuan an chung chiaha awm point khata sang zawk Manchester City thin an ti phu rang khawp ang.

Liverpool hian tun­hnai an match vawi rukah vawi nga chak hmel an hmu a, vawikhat an chak lo. An hneh lo erawh an hmelma kumhlun Manchester United an ni a, an khelmual Anfield-ah 1-2 in an hneh lo. An elpui team lian pahnih a zawna hneh loh hi an duh lo ang.

Arsenal tan Jack Wil­shere-a inlan thei tawhin a rinawm a, ke artui hliam vanga rei tak a chawlh hnuin a dam leh ṭan tawh. Wenger-a'n a chhawr ngam leh ngam loh ah a innghat ang. Khup hliam vanga England in Italy an hmachhawn ṭuma khel thei lo Danny Welbekc pawh a dam leh tawh a, Alex Oxlade-Chamberlain erawh malpui hliam vangin a khelh theih a la rinawm loh.

Liverpool tan captain Steven Gerrard leh Martin Skrtel te hrem vangin an khel thei dawn lo a, Daniel Sturridge, Adam Lallana leh Raheem Sterling te hi hliam vangin England squad aṭanga inhnukdawk vek kha an ni a, zaninah erawh an dam hman tawh beisei a ni.

Tun hma chuan

Arsenal leh Liverpool an inkhelh in goal a lut tam thei khawp a, hat-trick ringawt pawh vawi nga hmuh tur awm tawhin Premier League chanchina hat-trick tamna ber inkhel a ni.

Liverpool tlarhnung ten Arsenal tlar hma dan an harsat ṭhin a, an in tum hnuhnung vawi 18-ah vawi khat chiah goal an la chhuah lo a ni.

Mahse, Liverpool hi Premier League club zinga Emirates Stadium-a tlangnel ber pawl an ni. Arsenal khelmualah Manchester United an chak hnem ber tawh a, vawi ruk an chak tawh. United tih loha chak hnem ber awmchhun chu Liverpool an ni a, Arsenal khelmualah vawi ruk an chak tawh.

Tunhnai vawi nga an inkhelhah Arsenal in vawihnih hnehna changin Liverpool in vawikhat hnehna an chang a, vawi hnih an in draw thung. Heng inkhela goal a luh tam ber ṭumin Liverpool in 5-1 in Arsenal hi an sawp a ni.

Eng nge an sawi?

Arsenal manager Arsene Wenger chuan, "Kan game hmabak zela chak duhna thinlung kan neih hian min pui ang. A pawimawh ber chu chak chhoh zel a, point hlawhchhuah zel hi a ni. Midang khelh danah kan innghat tur a ni lo. International break zawha chak result nena kir nghal hi a pawimawh a ni," tiin midang result-ah an innghah loh thu a sawi.

Liverpool manager Brendan Rodgers chuan, "Kan game hnuhnung bera United kan khelh ṭum khan ball kan keng thei lo em em a, kan mamawh angin ball kan chang tam tawk lo. Kha aia ṭha khan kan khelh a ngai a, point hlawhchhuah ngei ngei kan ngai a ni," tiin Champions League khel phak tur chuan an tan point hloh a thian tawh loh thu a sawi.