Tunge Premier League-ah top scorer dawn? Aguero Vs Kane Vs Costa

Season ṭan tirh khan Premier League top scorer atan a Tottenham Hotspurs forward Harry Kane ring chu an tlem ve khawp ang. Pawisa thapna lamah pawh Kane hi an ring lo, betting odd pawh 500/1 daih a ni.

500/1 awmzia ber chu thil thleng thei lo tihna a ni ber a, pawisa thapna buatsaihtute hian an ring hlawl lo tihna a ni. A ring dik chuan Re 1 dah zelah Rs 500 an dawng thei dawn tihna a ni a, a pawisa dah zat kha a let zanga zelin a pung dawn. Season tir aṭanga chhut chuan a mak lo, Kane hi top scorer atana rin chu a har ve khawp ang.

England tana a game hmasa bera goal khungtu Kane hi Chelsea forward Diego Costa nen goal 19 an khung tawh a, Manchester City forward Sergio Aguero-a'n goal 17 a khung tawh bawk. Player ṭha pathum hi tun dinhumah chuan Premier League top scorer tura rinkai an ni tawh a, goal 15 khung tawh Charlie Austin (QPR) bakah goal 13 khung tawh Arsenal duo Olivier Giroud leh Alexis Sanchez te chu an elphak a rinawm tawh loh.

Harry Kane, Tottenham Hotspur

Spurs forward Kane hian Leicester an hmachhawn ṭumin hattrick a siam a, chu chuan top scorer chart danglam theih zia a tarlang.

Kane hian tawnhriat a la ngah lo a, kum 21 chauha upa a nih avangin season tawp pressure san hunah tuna a chetṭhatna hi a tla hniam thei a. English forward hian season tawp pressure hi a paltlang theih chuan tuna a club khelhna mekah hian a cham rei thei lo ang.

Diego Costa, Chelsea

Liverpool defender Emre Can tlawh vangin Costa hi match thum hrem a ni. Kane leh Aguero te ang lo takin Costa inkhel hi hi a rorum a, yellow card vawi riat a hmuh tawh avangin hremna dang a hmachhawn leh thei bawk.

Hremna a tawk lo a nih ngat chuan Premier League hmahruai mektu striker rinawl Costa hi top scorer ni tura rinkai a ni. Chelsea-in club lian Manchester United, Arsenal leh Liverpool te an la hmachhawn dawn a, Costa hmabak hi a khirh hle.

Sergio Aguero, Manchester City

Argentine forward Sergio Aguero hi top scorer tura ring an awm chuan a mak lo. Tottenham lama goal li khung thei Aguero hian inkheh hmabak pariat a la neihah hian goal dang a khung belh leh ngei ang.

City khelh hmabak team pariat lakah Aguero hian tun season-ah goal riat a khung tawh. A vanduaina chu December thla khan inhliam vangin thla khat chhung a khel thei lo a, Costa ang bawka Atletico Madrid player hlui hian City a zawm tirh aṭangin goal khung theih loh season a nei ngai lo.