Chelsea midfielder Eden Hazard a chau

Chelsea playmaker Eden Hazard chu Belgium leh Israel-in Euro qualifying an khelh ṭumin second half-ah manager Marc Wilmots-a'n a lakchhuak. Wilmots chuan a player hian hliam a neih vang ni loin a chauh tawh vanga lachhuak a nih thu a sawi.

Kum 24-a upa Hazard hian tun season-ah Chelsea leh Belgium tan match 48 zet a khel tawh a, a dam a nih phawt chuan inkhel tura thlan a ni ziah. Chelsea-in Premier League a hma an hruai theih nana player ṭangkai a ni.

Hazard chuan, "Thlak ka ni kha a tirah chuan mak ka tiin ka lungawi lo hman hial. Kan manager Wilmots hnenah pawh a chhan ka zawt hial a ni. Ani chuan kuminah ka inkhelh tam tawh vanga ka chauh thu leh, ka theihna sang ber ti lang zel tur chuan chawlh ka mamawh thu min hrilh a, ka pawm thiam tawh e." tiin a sawi.

Chelsea hian zanin dar 10:00 hian Stamford Bridge-ah Stoke City an mikhual dawn a, an midfielder hi an chhawr thei ngei tur a ngaih a ni. Tun dinhmunah Chelsea hian point 67 hmu tawhin point rukin hma an hruai fal mek.