Paris khawpuiah Nadal a inlar

Boruak vawt leh hnawng angreng tak karah Rafael Nadal chuan French Open nomawi humhim tumin bul a ṭan, champion lai hian a match hmasa berah Egor Gerasimov chu 6-4, 6-4, 6-2 a hnehin second round a inhlangkai.

Thawhṭanni zan inkhel dangah champion tura rinkai zinga mi Dominic Thiem pawhin hnehna a chang a, seeded palina chang phak Daniil Medvedev erawh a chak lo - Russian tlangval hian hneh nei loin puanthuah a tel a ngai dawn.

Hun rei tak chhung hri leng vanga a inkhelh theih loh hnuah Nadal-a'n clay court season a hmang a, Rome Open-ah erawh beisei a phak lo. French Open-ah hian rinkai ber la ni mah se amah ring zo lo tu an awm phah.

Mahse, world number 2 hian ringhleltute chhan nan Court Philippe-Chatrier-ah darkar hnih leh minute nga chhungin hnehna a chang a, a service vawi khat hloh ve mah se a khingpui service hi vawi nga zet a chhuhsak.

Grand Slam vawi 19 champion tawh Nadal hian a ṭhat dan berin a la khel chhuak lo, tihsual a neih hnem bakah winners a la vaw chhuak tam tawk lo. Forehand hmanga kil tak takah na taka a vuak let pawp ang kha kan hmu tam rih lo a ni.

Nadal chuan, "Duhthusam ni nghal vek lo mah se bul ṭanna ṭha pangngai tak a ni, second round ka luh avangin ka lawm," a ti. Zanin hian a match pahnihna atan world number 211 Mackenzie McDonald a hmachhawn leh dawn.

Darkar hnih leh minute ruk chhungin Dominic Thiem-a'n Marin Cilic 6-4, 6-3, 6-3 in a hneh. US Open champion hian set khatna la turin game kuanaah Cilic-a service a chhuhsak a, a khingpui nawr aia mahni inven ngai pawimawh chungin set hnuhnung pahnihah pawh a chungnung.

Kum 27 mi Thiem hian US Open nomawi a chawi hnuah tournament a khelh lehna hmasa ber a ni a, clay court tournament lian atan inbuatsaihna nei mumal hman lo mah se season danga a inkhelh thiam ṭhinna hmun a nih avangin a buai phah vak lo.

Austrian tlangval Thiem chuan, "Clay court a ni a, boruak a vawtin a hnawng bawk, hetiang kara inkhelh hi chu ka ti ṭhang tawh. Junior huangah khan kan ram Austria-ah chuan 10 degree-ah kan lo inkhel fo tawh," tiin khaw vawt hnuaia inkhelh chu a tan a harsat loh thu a sawi. 

Thawhṭanni zan khan Paris khawpui vawh zawng hi 13C a ni a, player ṭhenkhat chuan vawt an tih vangin harsatna an tawk. Mipa leh hmeichhe player - nidanga thuamhnaw pan leh taksa lang tam ha ṭhin pawh an inthuam phui ang reng viau.

French Open khelh tawh china inkhel rei ber chu 2004 khan a thleng tawh, Fabrice Santoro leh Arnaud Clement ten darkar ruk leh minute 33 an khelh chu match rei ber a ni, kuminah hian match khelh rei pahnihna a thleng.

Lorenzo Giustino-a'n tualchhung tlangval Corentin Moutet chu 0-6, 7-6 (9-7), 7-6 (7-3), 2-6, 18-16 a hneh turin darkar ruk leh minute nga a mamawh. Moutet chuan, "Engmah ka ngaihtuah thei rih lo, ka chau takzet," tiin inkhelh zawhah a sawi.

World number 157 Giustino hian Grand Slam main draw chinah a vawi khat nan hnehna a chang a, a hun tawn hi chhinchhiah tlak bik a ni. A match lehpekah chuan seeded 12-na Diego Schwartzman nen an inhmachhawn leh ang.

Grand Slam inkhel hi chu a rei ṭhin, 2010 Wimbledon-ah khan John Isner leh Nicolas Mahutb chu darkar 11 leh minute nga an lo inkhel tawh! Ruah surin a tih buai kara khel an ni a, ni thum lai a awh. Tun hnuah erawh set hnuhnung ber tie break khelh dan an ti danglam a, match rei lutuk a awm ta meuh lo.

Champion rinkai phak Daniil Medvedev chu Marton Fucsovics lakah 6-4, 7-6(3) 2-6, 6-1 in a chak lo. Russian tlangval hian French Open main draw hi vawi li a khel tawh a, first round a la paltlang miah lo! A tan chuan clay court hi hmun ṭha lo tak a ni.

Medvedev chuan, "Paris khawpuia ka record ṭha lo tak ka thai reh thei lo hi a pawi, engtik niah emaw chuan result ṭha ka la nei ang," a ti. World number 5 hi hard court-ah chuan player ṭha leh tawhkhirh tak a ni a, court dangah erawh a ropui lo hle.

Inkhel dangah seeded 14-na Fabio Fognini chu Mikhail Kukushkin lakah 7-5, 3-6, 7-6 (7-1), 6-0 in a chak lo, seeded chang phak zinga mi Felix Auger-Aliassime (19) pawh Japanese player Yoshihito Nishioka lakah 7-5, 6-3, 6-3 in a chak lo bawk.

Tualchhung tlangval, French number 1 Gael Monfils chu seeded pariatna lai ni phak mah se a chak lo. A khingpui world number 49 Alexander Bublik lakah 4-6, 5-7, 6-3, 3-6 in a tlawm, beisei loh result kan hmuh chhunzawm a nih pawhin a mak lo ang.