Zaninah Dortmund Vs Bayern
Zanin dar 10:00 hian Bundesliga hmahruaitu Bayern Munich-in Signal Iduna Park-ah Borussia Dortmund hmachhawn turin an leng lut dawn.
Tun hnai season nga chhung khan German league roreltu club lian pahnih hian club dang tan champion-na kawng an hawn lo. Kum dang ang chu nise champion tur zawnna ang hial a ni thei ang, mah se kuminah Dortmund an chet ṭhat tawk loh avangin an dinhmun a inthlau rih hle. An inkarah hian team pariat ngawt an awm mek.
Bayern hian League match 26 khelh tawh aṭangin point 64 an hmu tawhin point 10-in hma an hruai fal mek a, Dortmund erawh 10-naah awmin point 33 chauh an la hmu thung. An inthlauhna hi point 31 zet a ni rih mah se player chhutirn Dortmund hi Bundesliga-a Bayern elpha ber tur an ni.
Dortmund-in Champions League-a Juventus an hneh loh hnuah insiamṭha nghalin an game hnuhnung berah Hannover chu 3-2 in an hneh leh tawh. Bayern erawh an match hnuhnung berah beisei an phak lo a, an mahni khelmualah ngei Borussia Monchengladbach lakah 2-0 in an chak lo.
Dortmund aṭanga Bayern pantu striker Robert Lewandowski chuan a club hlui aiin a club thar chu nuam a tih zawk thu leh hma a sawn thu a sawi a, Dotmund phatsana Bayern zawmtu Polish foward hi mikhual team fans-in an dawnsawn ṭhat a rinawm loh. Lewandowski hian Bayern tan League match 24 khel tawhin goal 13 a khung tawh a, ani bakah Dortmund player hlui Mario Gotze-a'n Bayern jersey a ha bawk ang. Player pahnih hi inkhelh hma chanchin ti ngaihnawmtu an ni.