Sterling a chhuak lo ang - Rodgers

Liverpool manager Brendan Rodgers chuan an rawlthar duhawm Raheem Sterling chu a chhuah loh tur thu a sawi.

Rodgers chuan, "Liver­pool hi football club ropui ber pawl a ni a, kan club neitu te'n kan player zing a mi tupawh hralh an duh loh chuan kan hralh lo ang," tiin Sterling chu hralh tumna an neih loh thu a sawi.

Kum 20-a upa English player hian kar khata pound nuai khat (Rs. 92,07534) hlawh tura Liverpool in contract thar an zawrh chu a hnawl a ni.

Liverpool rawlthar Raheem Sterling hian BBC in an kawmnaah Liverpool in contract thar an zawh hi a hnawl thu sawi chhuakin a duh ber chu sum leh pai ni lo in trophy chawi a nih thu a sawi.

Sterling chuan, "Eng car nge ka khalh dawn tih leh eng ang in ropui nge ka neih dawn tih hian min tibuai lo, trophy chawi a champion nih hi ka lungkham ber chu a ni," a ti.

Sterling-a interview hi sawichhuakin Rodgers chuan, "Interview phalna kan pe lo chungin interview a lo nei a, mahse hei hi chu a naupan leh thil hriat loh vang mai mai niin a lang. Kan naupan lai chuan thil kan tisual fo a ni. Trophy tam tak lak a duh thu a sawi a, Liverpool hian hei hi kan tum ber chu a ni. A tumna leh kan tum hi a inmil a, kan hnenah hian cham zel se, a hmasawnna atan pawh chu chu a ṭha ber a ni. Liverpool te ang club ropui tana a khel phak hi a inchhuang tur a ni," a ti.

Sterling hian Liverpool-ah kum hnih contract la neiin kar khatah pound 35,000(Rs. 32, 22637) a hlawh mek a ni.