Vawiinah I League 2nd Division Mizoram Club Vs West Bengal Club
I League 2nd Division-ah vawi hnih khelha chak ve ve thei chu Aizawl FC leh Chanmari FC te chiah an awm tawh. Zing dar 9:30-ah Aizawl FC leh Mohammedan SC te Kanchenchunga Stadium-ah an inkhel ang a, tlai dar 3:30 hian SSB Ranidanga-ah Chanmari FC-in United Sports Club an hmachhawn ang.
Mohammedan SC hi...
Sulhnu neih ṭhat zawnga thlir chuan Mohammedan SC hi team
ṭha ber tura ngaih an ni. I league-ah team pakhat chiah an luh chhoh dawn avangin East Bengal leh Mohun Bagan te nena inel tawk ṭhin Mohammedan SC hi an langsar hle.
Mohammedan hian an match hmasa berah anmahni ang bawka Kolkata club United SC 2-0 in an hneh nghal a, amaherawhchu an match hnihnaah Aizawl FC laka 4-1 ngawta tlawm Lonestar Kashmir chu 2-1 in Ningani khan an hneh lo.
Chanmari FC coach H. Vanlalthlanga chuan, "Lonestar Kashmir hi an ṭha a, Aizawl FC nen an inkhelh ṭum khan an lama an tih luh vang khan an hnual em a ni. Mohammedan an hneh kha a mak lo. Chutihrualin Mohammedan pawh chak lo mah se an ṭha tho mai, goal-ah an vanduai a, Lonestar ai kha chuan an goal bawh a na zawk," a ti.
Aizawl FC technical director Hmingthansanga pawhin Chanmari boss thusawi ṭawm puiin, "Mohammedan kha ka hmuh dan chuan Lonestar aiin an ṭha zawk. Hneh chiang sa turah kan dah loh hrim hrim a, chak loh theih a ni tih kan chiang. An foreign striker Daniel Bidemi-a'n goal la khung lo mah se game-ah chuan a thawh hlawk khawp mai. Kan khingpui tur hi team ṭha an ni," a ti.
Hmingthana chuan sawi zuiin, "Kan player-te an dam kim a, chak tumin kan khel dawn," a ti a, a thusawi dan aṭangin a zam lo.
United SC hi...
S. Malsawmtluanga khelh ṭhinna Chirag United SC hi team chhia an ni thei lo. Chirag nena an inthlunzawm tawh loh avangin United SC an ni tawh a, kum 1927 daiha din tawh khan Eveready Association hminga din ṭan a ni.
Kolkata Derby-ah United SC hian Mohammedan an ngam lo a, amaherawhchu match hnihnaah Liberian forward Eric Brown hmangin PIFA goal khatin an hneh a, I League khel turin Chanmari FC hneh a pawimawhzia an hre chiang ang.
Aizawl FC technical director Hmingthana chuan, "United Sports hi Eric Brown-a'n a ho thei a, an player-te an naupan bawk avangin an che rang khawp mai. Khelpui harsa tak an ni ang," tiin Chanmari khingpui tur chungchang a sawi.
Chanmari FC coach H. Vanlalthlanga chuan, "Team tin an ṭha em em vek a, player pawh an nei ṭha. Amaherawhchu team dang nena kan danglamna chu khelh dan phung kan neih ṭhat zawkna hi a ni. Kan khelh dan kan bel ṭan a, kan khelh sual loh chuan United Sports Club hi kan hneh ka ring. Chutihrualin tihsual palh chuan goal khung hi an awlsam hlawm em em a, vanduai theih a ni," tiin a sawi.
Chanmari FC-in an match hnuhnung bera Hindustan an hneh ṭumin goalkeeper Lalawmpuia a inhliam a, United Sports hmachhawn turin a dinhmun a chiang lo.
VAWIIN INKHEL TUR
ROUND 3
Kanchenchunga Stadium
9:30 AM Aizawl FC Vs Mohammedan SC
3:15 PM Lonestar Kashmir Vs PIFA
SSB Ranidanga
9:30 AM Kenkre Vs Hindustan FC
3:15 PM Chanmari FC Vs United SC
RESULTS
ROUND 1
Chanmari 4 - 1 Kenkre
CFC : Malsawmfela 33'; Joel 33', 47'; F.Lalrinpuia 61'.
Kenkre : Yash Mhapre 54'
Mohammedan 2 - 0 United SC
MSC : Bedemi 50'; Hembram 79'
Aizawl FC 4 - 1 Lonestar Kashmir
Aizawl FC : Rahul 34' (OG); Zoramthara 45'; Alfred 75';
H. Lalbiakthanga 90'
Lonestar : Chizoba 78'
PIFA 2 - 2 Hindustan
PIFA : Ozowara Chinimoso Elvis 21'; Sandesh Gadkari 24'
Hindustan : James Effiong 31'; Dilli Ram Sanyasi 68'
ROUND 2
Kenkre 1 - 4 Aizawl FC
Kenkre : Yao Kouassi Bernard
Aizawl FC : Albert Zohmingmawia 6'; Emmanuel Chigozie 8'; David Lalrinmuana 75'; Morgan Justice 80'
Hindustan 2 - 6 Chanmari
Hindustan : James Effiong 11'; Dilli Sanyasi
CFC : Lalbiakhlua 24', 27', 38'; Joel Sunday ; Laldingngheta 68'; Joseph Lalnunpuia 90'
Mohammedan 1 - 2 Lonestar Kashmir
MSC : Somide 43' (P)
Lonestar : Ajay Singh 24', 62'
PIFA 0 - 1 United SC
United : Eric Brown 43'