Djokovic leh Williams an kal zel

Miami open quarter final-ah world number 1 Novak Djokovic chuan a khingpui David Ferrer chu inkhel inhnehtawk takah 7-5 7-5 in a hneh hram. Semi final-ah John Isner nen an in hmachhawn leh ang.

British number 1 Andy Murray pawhin world number 36 Thiem chu set khat a hloh zet hnuah 3-6 6-4 6-1 in a hneh let a, semi final a lut ve bawk. Semi final-ah hian Tomas Berdych nen an inhmachhawn leh a, result erawh kan hre hman lo.

Hmeichhe lamah world number 1 Serena Williams-i'n final a lut a, semi final-ah Simona Halep chu 6-2, 4-6, 7-5 in a hneh. Serena hi tunlai hmeichhe tennis khel zingah chuan a chungnung hle a, quarterfinal-a Lisicki a hneh kha a inkhelh hun chhunga vawi 700 a chak tlin na chiah a ni. Chawlhkar 110 chhung zet World number 1 nihna a hauh tawh bawk a ni.

Hmeichhe player zingah WTA match vawi 700 chak thei hi mi pariat chiah an la awm a ni. Hmeichhe zinga chak hnem ber chu Martina Navratilova niin vawi 1,442 a chak thei a ni.

Williams chuan, "Record siam leh thildang hian min ti buai vak ngai lo, ka duh ber chu a ṭha thei ang bera tennis khelh hi a ni tawp mai. Chumi tur chuan inkhelh zawng zawngah ka theih tawp ka chhuah ṭhin," tiin a sawi.