Captain chunga rinna nghattu Pellegrini

Manchester City ma­nager Manuel Pellegrini chuan an team captain Vincent Kompany chungah rinna a nghah thu leh a mimal tak pawn a rintawk thu a sawi.

Manchester City defender hi tunkar khan Belgium leh Israel te inkhelh ṭumin yellow card pahnih hmuh vangin hnawhchhuah a ni. Tun season-ah a hliam vangin a inkhel thei lo zauh zauh a, thla hmasa khan Leicester nen an inhmachhawn ṭum pawhin coach-in bench-ah a ṭhut tir a, hun harsa a hmachhawn mek.

Pellegrini chuan, "Kompany chungchang­ah hian buaina tur awmin ka hre lo, a chhan chu amah hi ka hrechiang a ni. Player puitling a ni tawh a, tlak hniam leh chet ṭhat loh lai chu a awm thei teh meuh mai, mah se kawng dik a zawh leh nghal ang," tiin an captain a rintawk thu a sawi.

Premier League chung­chang sawi chhun­zawmin Pellegrini chuan, "League-ah chuan inkhel zawng zawng hi a hautak em em vek a ni. Season tharah Champions League khel tur chuan inthlahdah a thiang lo hrim hrim. Kuminah pawh hian Champion kan duh takzet a nih chuan kan game khelh leh tur zawng zawngah kan chak vek a ngai tawh ang," tiin a sawi.