Ronaldo-a'n penalty a khung lo

Juventus ke chheh a rem hlei thei lo, an thiampuipa Cristiano Ronaldo-a'n penalty aṭangin a club chakpui theihna hun ṭha nei mah se a hlah - Old Lady hi an mikhual Atalanta nen 1-1 in an inhnehtawk.

Nilaini zan Serie A inkhel dangah hmahruaitu AC Milan pawh an chak zo lo a, pahnihna Inter Milan erawhin an elpui Napoli an hneh avangin Milan an hnaih sawt; Milan club pahnih inthlauhna hi point khat chauh a ni ta.

Allianz Stadium-ah Juventus lamin minute 29-na lekah Federico Chiesa hmangin goal hmahruai an khung, chak tlang tura rinkai an ni. Mahse goal dang an khung belh lo a, second half tir lamah Remo Freuler-a'n yard 25 a hla aṭangin an si phurh a sut.

Goal khat ve ve an neih hnuah Chiesa chuan penalty a hlawh chhuak a, a pet turin Ronaldo a rawn ding chhuak. Portuguese forward hian goal ban bulah pet mah se keeper Pierluigi Gollini-a'n a lo dansak.

Aston Villa keeper hlui Gollini hian Alvaro Morata goal khung tur pawh ṭha takin a dang thei a, khualmuala point khat an hmuh theih nan a thawh hlawk hle. Atalanta hian point 18 hmuin pariatna dinhmun an luah.

Tun hnai season kua zet Italian champion ni thei Juve hian Andrea Pirlo kaihhruaina hnuaiah league match 12 an khel tawh a, an la tlawm lo. Mahse ṭum ruk ngawt chu an khingpui nen an inhnehtawk avangin record ropui tak a ni lem lo.

Zlatan Ibrahimovic awm loh karah Milan-in point an hloh ta zeuh zeuh, an mikhualna ramah Genoa nan 2-2 in an inhnehtawk. Milan hian match 12 an khelh tawhah Juve ang bawkin chak loh an la nei lo thung.

Inkhel dangah Inter Milan chuan minute 73-naa Romelu Lukaku-a penalty hmangin Napoli 1-0 in an hneh. Penalty an chawi dana lungawi lo Italian forward Lorenzo Insigne chu hnawhchhuah a ni zui a, mikhual team an tho chhuak tawh lo.

Napoli coach Gennaro Gattuso chuan, "Hetiang thil hi chu Italy-ah chauh a thleng ṭhinin ka hria, a nihna takah chuan player-te hian referee hnenah thil thlen dan leh an ngaihdan an hrilh ve thei tur a ni," tiin a sawi.

Inter Milan coach Antonio Conte chuan, "Inkhel pawimawh bika hnehna chan hi chu a hlu, point thum kan hmu a ni satliah lo a, kan elpui team khan point kan chhuhsak tel bawk. Inkhel ropui tak ni lo mah se a chak zawk nih hi a hlu," a ti.