A thar ang zel a ni - Ramos

Real Madrid captain Sergio Ramos tan tun season hi Champions League vawi 17-na tur a ni a, Spanish defender hi a khel tam satliah lo - UCL nomawi vawi li a chawi tawh.

Los Blancos hian zanin dar 10:25 hian Shaktar Donetsk an mikhual dawn a, Ramos hi match hnuhnung bera Cadiz an hneh loh ṭumin hliam vanga thlak a ngaih avangin a dinhmun a chiang lo.

Chutihrualin Thawh-ṭanni khan Ramos hian training ṭha tak a nei thei a,  Shaktar Donetsk a hmachhawn thei lo a nih pawhin kartawpa Barcelona nen El Clasico an inkhelh hunah chuan a inlan thei ang.

Kum 34 mi Ramos chuan, "Kum tinin a tharin ṭan a ngai a, season liam ta aṭangin engmah kan chhawm lo. Match zawng zawng kan hlut thiam a ṭul a, nomawi thar kan inchuh a, rilru thar kan put a ṭul," tiin a sawi.

Real Madrid hian Zinedine Zidane leh Cristiano Ronaldo hoin Champions League an thunun a, amaherawhchu Ronaldo-a'n Juventus a pan hnuah Zidane rawn let mah se nomawi an la chawi leh lo.

Los Blancos hian season hnuhnung pahnihah group stage an paltlang a, last 16-ah tla ve ve. Tun season-ah phei chuan Ukrainian club ṭha Shaktar bakah Italian club Inter Milan leh German club Borussia Monchengladbach te an awm avangin group stage paltlang pawh a harsa ang.