Serena leh Osaka an chak

US Open last 16 lut turin Serena Williams leh Naomi Osaka ten fiahna hautak an hmachhawn a, champion tura rinkai pahnih hian harsa angreng takin an khingpui ve ve hnehin third round an paltlang a ni.

Inrinni Flushing Meadows, New York-a inkhelah vawi ruk champion tawh Serena hian Sloane Stephens chu 2-6, 6-2, 6-2 in a hneh. American player pahnih hi an inhlau lo tawn a, darkar khat leh minute 44 an inkhelh meuh chuan tawnhriat ngah zawk a dingchang.

Kum 38 mi Serena chuan, "Match hautak tak a ni, ani nen hi chuan match hautak kan lo khel tawh ṭhin. A chang hi chuan chak turin vanneihna kan mamawh tel 

ṭhin a ni," a ti.

Grand Slam vawi 23 champion tawh Serena hian a match lehpekah chuan Maria Sakkari a hmachhawn dawn, Greek nula nen hian US Open inbuatsaihna Western and Southern Open-ah khan an lo intawng tawh - Serena hi chak nawn tura ngaih a ni.

Inkhel dangah Naomi Osaka pawhin Marta Kostyuk chu 6-3, 6-7 (4-7), 6-2 in a hneh. Japanese nula hian set thumna bikah break point vawi nga ngawt a inchhanhim hram a, chak turin vanneihna a mamawh ve bawk.

US Open 2016 champion Angelique Kerber leh Petra Kvitova te pawhin hnehna an chang a, anni pahnih hi tournament khelh ṭan dawn khan rinkai zingah tel chiah lo mah se inelna an hmachhawn danah rinkai an ni tawh.