Fenerbahce team bus an kap

Turkish Super Lig hma­hruaitu ni mek Fener­bache chuan khualmuala Turkish club tho Caykur Rizespor chu 1-0 a an hneh hnu lawkin beih an tawk a, Trabzon airport pana team bus-a an tlan laiin silai in an lo kap a ni.

Team player zingah hliam tuar an awm lo a, bus khalhtu driver erawh a hliam vangin Hospital panpui nghal a ni.

Turkish Football Federation chuan he thil thleng hi an dem takzet thu an auchhuahpui tawh a, Fenerbahce general secretary Mahmut Uslu chuan beih an tawhna chu thil dik lo tak a nih thu a sawi bawk.

Fenerbahce team bus in beih a tawh laia team bus a chuang ve Uslu chuan, "Infiamna nei turin he hmunah hian kan rawn kal a, thlamuang taka football khel tura lokal kan ni," tiin beih an tawk mai chu a hrethiam lo hle.

Rizespor club in­nghahna khawpui Trabzon governor Abdulcelil Oz chuan bus hi lung hmanga beih niin a sawi a, mahse zirchian a nih hnuin silai hmanga team bus hi beih a nih thu a puang leh a ni.

Oz chuan, "A tir lam­ah kha chuan lung hmanga beih niah kan ngai a, mahse Fenerbahce team bus hi silai hmang ngeia beih a ni tih hi tunah chuan kan tichiang tawh a ni," a ti.

Turkish President leh Fenerbahce fan ni bawk Recep Tayyip Erdogan chuan Trabzon governor hi he chhiatna chungchang zirchiang turin thu a pe tawh a, Prime Minister Ahmet Davutoglu chuan zir­chianna chu an kalpui mek thu a sawi bawk.

Fenerbahce hi tunah Turkish Super Lig hma­hruaitu ni mekin Premier League player lar ṭhin Dirk Kuyt, Raul Meireles leh Emre te chu an player langsar an ni.