Chelsea tlawm nan Adam goal ropui a tawk zo lo
Chelsea chuan Premier League-a hmahruaitu an nihna an chhawm nung zel. Stoke City tan Charlie Adam chuan yard 65 vela hla aṭangin goal ropui khung mahse a team a chhandam zo lo a, Chelsea in 2-1 in hnehna an chang.
Stamford Bridge-a inkhelah hian Chelsea tan Eden Hazard chuan minute 39 naah penalty aṭangin an goal hmahruai a khung a, penalty hi Cesc Fabregas hlawhchhuah a ni. Hazard tan premier League-a penalty vawi kua a pet tawha a vawi kaw pet luhna niin Dimitar Berbatov nen Premier League-a penalty an pet zawng zawng pet goal vek awmchhun an ni.
Chelsea lawm chhung a rei lo a, minute 44 naah Liverpool player hlui Charlie Adam chuan Stoke City tan goal ropui a khung a, Chelsea keeper Thibaut Courtois rawn tlanchhuak chu hmuin Adam hian yard 65 vel, field zahve aia hla aṭangin ball a pet a, he ball hi mawi takin Chelsea goal-ah a lut a ni. Adam-a goal hi Stoke in kum ruk hnua Chelsea goal-a an khung hmasak ber a ni.
Loic Remy chuan Chelsea tan minute 62 naah Chelsea chakna goal a khung a, a goal khung hi Stoke City keeper Asmir Begovic tihsual vanga lut a ni. Goal dang luhbelh tawh lo in Chelsea hi 2-1 in an chak ta a ni.
Chelsea hian Premier League-ah point sarihin hma an hruai fal tawh a, lawm lohna tur an neih erawh an striker rinrawl Diego Costa inhliam hi a ni. Costa hi second half-ah rawn tlan lutin, minute 11 hnuah malpui na vangin lakchhuah lehnghal a ni.
Eng nge an sawi?
Chelsea manager Jose Mourinho chuan, "A pawimawh ber chu point thum kan hlawhchhuak kha a ni. Kan inkhelh hma khan Premier League tawp thlenga hmahruai tur chuan vawi ruk chak leh vawi khat draw mamawh chungin kan khel a, tunah chuan vawi nga chak leh vawi khat draw chiah kan mamawh ta. Chu chu harsa mah se kan phu in ka hria. Stoke khan an defence kha an rem phui ṭha hle a, theihtawp chhuahin kan nawr a, kan chak ta a ni," a ti.
Stoke manager Mark Hughes chuan, "A chak lo zawk kan ni a, first half kan khelh dan khan min ti lawm lo hle a ni. Kah aia khel ṭha thei kha kan ni. Charlie-a goal kha a ropui takzet a, khatiang goal ropui kha khung a tum fo ṭhin a, a inrintawk avangin vawiinah a ti thei ta," tiin Blackpool captain hlui chu a fak.