Dortmund khelmualah Bayern an chak

Inrinni zan khan Polish striker Robert Lewandowski chuan a team hlui amah siam liantu Borussia Dortmund lamah goal khat khungin khualmualah Bayern Munich a chakpui.

Team pahnih hi inhal tak, German football thununtu pahnih an ni. Mahse, tunhnaiah Dortmund in beisei an phak lo a, relegate thei mai dinhmunah hial an ding hman. Season chawhnu lamah rawn che ṭha chho lehin table-ah 10-na ah an rawn inhlangkai leh. Bayern erawh fal takin Bundesliga hmahruaitu an ni mek. Hetiang tak hian inthlau mah se team pahnih inkhel hi a boruak a te thei lo.

Signal Iduna Park-a inkhelah hian team pahnih an inhnehtawk a, an inhlau lo tawn hle. Mahse, Bayern Munich in an bul ṭan ṭhat an vanneih pui a, an player ṭangkai Thomas Muller ball shot ṭha tak chu Dortmund keeper Roman Weidenfeller chuan lo dang perin a per lehlam hi Lewandowski chuan minute 36 naah a club hlui lamah a lo pet goal a ni.

Second half-ah Dortmund tan Marco Reus chuan chance duhawm tak a hlah bawk a, Bayern keeper Manuel Neuer chiah a hmachhawn tawh tihin a pet out hlauh. Hun tawp nan minute hnih chiah a awm tawh tihin Neuer hian Reus free kick ṭha tak chu a dang leh bawk.

Goal dang lut lo in hun a tawp a, Bayern in Bundesliga-a roreltu an nih zia an tilang chhunzawm zel.

Eng nge an sawi?

Borussia Dortmund manager Jurgen Klopp chuan, "Inkhel bul ṭan tir minute sawm vel kha chu kan khel ṭha hle a, mahse a hnuah khan beisei kan phak ta lo a ni. Bayern kha tharumah an chak zawk a, second half-ah rawn khel ṭha deuh mah ila Bayern khan an khel ṭha em a, chak an phu a ni," a ti.

Bayern Munich boss Pep Guardiola chuan, "First half-ah khan inkhelh a harsa em em a, second half-ah pawh khel ṭha lo mah ila kan defending ṭhat vangin goal kan chhuah lo a ni. A bik takin Dante khan a khel ṭha a, amah ang 1000 vel hi ka team-ah neih ka duh a ni," tiin khel ṭha Dante chu a fak hle.