Manchester United che ṭha tluang zel
Old Trafford-ah Manchester United-in Ander Herrera goal hnih leh Wayne Rooney goal ropui hmangin Aston Villa 3-1 in an hneh a, Premier League-ah a zawnin vawi nga an chak ta. An hmachhawn leh tur chu Manchester City leh Chelsea te an ni.
Inrinni zan inkhel dangah Everton-in Phil Jagielka goal hmangin Goodison Park-ah season bul ṭan ṭha Southampton an hneh a, table mawngphaha awm Leicester City-in West Ham 2-1 in an ngam a, relegaton zone-a awm Queens Park Rangers-in 4-1 ngawtin West Bromwich Albion an sawp a, Swansea-in an mualah Hull City 3-1 in an hneh bawk.
Van 'Go' hoin
Manchester United-in manager Louis van Gaal hnuaiah game awmze an nei khel thei ta a, Aston Villa hmachhawn turin ram tana che ṭha Radamel Falcao leh Angel di Maria te starting eleven-ah telh an ni lo.
Ṭum dang ang bawkin United game plan-ah palian Marouane Fellaini a pawimawh a, game mawitu tak erawh Spanish duo Juan Mata leh Ander Herrera te an ni. Athletic Bilbao aṭanga United zawmtu Herrera finishing a class a, first half leh second half-ah goal a khung.
Rooney goal mawi tarlan hmaih a thiang lo, changtu karah England captain hian ṭha taka ball a dawnsawn hnuah a volley goal nalh hle. Amaherawhchu Rooney goal khung hnu lawkah keeper David de Gea-a'n Belgian striker Christian Benteke pet chu a zak hnuaiah ho takin a chhuah. Hemi hnu hian United talbuai mah se Herrera goal hnihna hmangin 3-1 in an chak.
Minute 77-naah Falcao a inlan a, mipuiin an thawm aṭangin Colombia tan match hnihah goal thum a khung tih an hriat pui a, mah se goal khungna tur chance ṭha a hmu lo.
United-in 77% ball possession an nei a, an goal-ah vawi hnih chiah an pet tir. Dutch manager Louis van Gaal chuan, "Tlak hlau khelh hi chu engtik lai pawhin a harsa, first half-ah chance ṭum li vel zet kan nei a, goal chance kan pe ve lo. First half kan khel ṭha a, second half kan khel a mawi zawk," tiin a sawi.
Saints an zuih
Southampton-in season tawp boruak an zo lo ṭan tih a lang a, inkhel thunun chung siin Everton lamah goal an khung thei lo a. American keeper Tim Howard a khel ṭha a, minute 16-naa defender Phil Jagielka khung hmangin mualneitu Everton 1-0 in an chak.
Point hlawhchhuak zo lo Southampton tan season thara European competition-a telna chance a chhe tial tial a, mah se Dutch manager Ronald Koeman hnuaia an record hi a la ropui hle. Saints hian nikuma Mauricio Pochettino hnuaia an point hmuh zat 56 tluk turin point thum chauh an mamawh tawh.
Southampton boss Ronald Koeman chuan, "Result a lungawi thlak loh a, kan khelh dan erawh a ṭha takzet. Kan khingpuite'n goal venhim an tum a, second half-ah goal chance neih a harsa a, Everton an tumah an hlawhtling a ni," a ti.
Everton-in tun season Premier League match hnuhnung 20-ah match ngaah goal an chhuah lo.
Relegation Battle
Leicester City-in tlak mai an tum lo. Argentine midfielder Esteban Cambiasso-a'n yard 20 aṭangin goal ropui a khung a, West Ham United-in Chiekhou Kouyate hmangin first half-ah vek sut mah se minute 86-naah substitute Andy King-a'n chakna goal a khung.
Point 22 hmu tawh Leicester-in an chunga awm QPR leh Burnley point thum ve ve in an pha lo. QPR pawhin relegation zone chhuahsan an tum ruh hle; QPR tan Eduardo Vargas, Charlie Austin, Bobby Zamora leh Joey Barton hmangin 4-1 in hnehna an chang a, Zamora goal hi season tawp goal mawi thlan huna nominee-a tel tlak a ni.
Premier League-ah khelh tur a tam tawh lo a, a mawng ber Leicester thlengin him thei an la ni.
Inkhel Results
Arsenal 4 - 1 Liverpool
Everton 1 - 0 Southampton
Leicester 2 - 1 West Ham
Man Utd 3 - 1 Aston Villa
Swansea City 3 - 1 Hull City
West Brom 1 - 4 QPR
Chelsea 2 - 1 Stoke City