Online FIFA Futsal Referee Instructor Course-ah MFA mi pahnihin zo

October 14-18, 2020 chhung khan FIFA Futsal Referee Instructor Course chu All India Football Federation hnuaia mite tán buatsaih a ni a, mi 35 telin an zinga pahnih hi Mizoram Football Association aiawhte an ni. 

Lalbiakdika Ngente, Bungkawn leh VL Rinpuia, Durtlang Leitan-te chu he hunah hian telin an instructor chu Iran lama FIFA Futsal Referee instructor Seyed Moosavi a ni.

Futsal Referee Instruc-tor Course-ah hian FIFA Futsal Law thar ber chipchiar taka zir a ni a, FIFA hnuaia futsal kalpuinaa dan hmante inhrilhfiah a nih bakah dan siam ṭhat hman nghal dante thlenga zir a ni. 

VL Rinpuia chuan, "MFA-in futsal ṭha takin kan kalpui a, AIFF lamin kuminah ISL leh I League club bakah futsal league nei state a champion team tán inelna buatsaih a nih tur thu a puang a, mahse Covid-19 vangin kan kalpui thei ta lo. Hetiang hun thawl ṭha hmang ṭangkaia FIFA Instructor hnuaia Futsal dan zirna remchang AIFF-in a buatsaih hi a lawmawm takzet a ni, " a ti. 

MFA Futsal Com-mittee-a assistant secretary nilai Lalbiakdika chuan,"FIFA Futsal World Cup kan hria a, FIFA hnuaia inelna hrang hrangte pawh kan hria a, tuna FIFA dan thar ber vek hi hman tur a ni a, chumi a zir hmasa zinga kan tel hi kan nihlawh khawp mai," tiin a sawi a; MFA hnuaia Futsal Referee-te pawhin nakinah an hlawkpui ngei a rin thu a sawi. 

MFA Futsal League chu Covid-19 avangin khelh theih a ni ta lo a, hei bakah hian MFA hnuaia Futsal inelna hrang hrang duan lawkte pawh ṭhulh a ngai a; boruak a ṭhat hunah MFA chuan futsal inelna hi changtlung zawka kalpui chhoh zel a tum a ni.