Juventus-in champion an hnaih

Carlos Tevez goal khat thun hmangin Juventus chuan an khingpui Genoa chu 1-0 in an hneh. Juve hian Serie A-ah point 14 zetin hma an hruai fal tawh a, match 10 khelh tur la awm mah se champion an hnaih tawh hle a ni.

Kum 31-a upa Tevez hian Champions League-a Juve-in Dortmund an hneh ṭum khan goal hnih thunin a khel ṭha hle a, a khelh ṭhat hi chhunzawmin kartawp inkhelah pawh chakna goal a khung leh a ni.

Manchester City striker hlui hi tun season-ah a khel ṭha tluang hle a, tun season-ah a club tan goal 24 a khung tawh a ni. Juve hian inhliam vangin midfielder Paul Pogba an chhawr thei lo mah se striker Tevez hi innghahna tlak khawpin a khel ṭha ṭhin a ni.

Juventus hi tun season lea­gue match 28 an khelh tawh aṭangin vawi 20 an chak thei a, a zawna a vawi li nan champion an hnaih tawh hle a ni.

Inkhel dangah pahnihna Roma an chak ve zel a, minute 25-na a Miralem Pjanic goal thum hmangin Napoli chu 1-0 in an hneha League-ah pahnihna an nih chhunzawm zel.

Filippo Inzaghi-a'n AC Milan a chakpui ve leh a, 3-1 a Cagliari an hneh hnuah Palermo chu 2-1 in an hneh leh a, hmalam an pan ve zel. Alessio Cerci leh Jeremy Menez ten Milan tan goal khat ve ve an khung a, Paulo Dybala chuan Palermo tan penalty aṭangin goal a khung ve bawk.