Zaninah City an inlan dawn

Premier League inkhel zaninah hmuh tur a awm dawn a, dar 12:30 hian Manchester City chu Crystal Palace khelmualah an lenglut dawn.

Inrinni zanah top four huang chhunga mi hmahruaitu Chelsea bakah Arsenal leh Manchester United te an chak avangin City tan chak ngei ngei a pawimawh dawn a, champion an tum chuan khualmualah chak result an hlawhchhuah ngei a ngai ang.

Crystal Palace hi Newcastle United boss Alan Pardew an lakluh hnuah hma an sawn a, an game hnuhnung parukah vawi hnih chiah an chak lo a, vawi thum an khingpuite hnehin vawi hnih an tlawm a, vawi khat an khingpui te an draw thung. An match hnuhnung vawi hnihah QPR leh Stoke City hneha an chak zawn avangin an phur vanglai tak a ni ang.

Manchester City hi season tir lamah Chelsea nen an inum chho zak zak a, tunhnaiah an tawlhthluk avangin khelh zat in angah hmahruaitu Chelsea aiin point kua in an hniam tawh. Champion tur chuan an chak chhoh zel bakah Chelsea chetsual an chan a ngai tawh ang. City hian an game hnuhnung parukah vawi li hnehna changin vawi hnih an chak zo lo. Manchester khaw club tana ngaihṭhatna tur erawh Palace nena an intum hnuhnung vawi sarihah hnehna an la chang vek thei hi a ni.

Palace tan striker Marouane Chamakh leh Fraizer Campbell te chu inhliam vangin an khelh theih a rinawm loh a, Mile Jedinak chu hrem vangin a inkhel thei lo bawk. An player rinrawlte inhliam hi Palace tan a pawi thui thei.

City erawh an player inhliam Yaya Toure leh Aleksandar Kola­rov te an dam ṭhat tawh avangin player inhliam nei loin Selhurst Park-ah an thlawh thei ang.

Eng nge an sawi?

Crystal Palace manager Alan Pardew chuan, "Team lian Southampton, Liverpool leh Arsenal te kan khelh ṭumin kan khel ṭha em em a, City hmaah pawh hian khatiang tak khan kan khelh theih ka beisei. City hneh tur hian ka inbeisei lo a, mah se a tir aṭanga kan nawr theih chuan kan chak thei a ni," a ti.

Manchester City goalkeeper Joe Hart chuan, "Tunhnaiah beisei angin khel chhuak lo mah ila zanin a kan inkhel tur hi insiamṭhat nan hman kan tum ang. Game riat khelh tur a la awm dawn a, hengah te hian kan chak chho vek a nih chuan kan la champion thei a ni," a ti.